U Abhinav Kuman Singh, IAS uba long ruh u Sub-Divional Officer (Civil) jong ka Amlarem Sub-Division ula plie paidbah ia ka training kaba la pynlong da ka Society for Urban and Rural Empowerment (SURE) ha ka dorbar hall jong ka shnong Syndai Kmai Shnong mynta ka sngi. Ha kane ka sngi palat sanphew ngut ki nongwan shim jinghikai kila wan ban iashim bynta ha kane ka jingialang. Haka jingkren jong u kum u kongsan u Abhinav ula ong ba kane ka training ka long kaba donkam bha na ka bynta ki samla jong kane ka thaiñ bad u sngewkmen ba nalor kaba ai training, ka SURE ka shimkhia ruh ban ai training halor ki jingbam tynrai jong kane ka thaiñ ruh. U Abhinav ula ong ruh ba ha dang shen uwei u nongshet na Assam ula jop ha ka jingiakop Maser Chef bad u kylli ba lada na Assam ki lah ban jop balei ki briew jong ngi kin ym lah?
Kane ka training kan long na ka bynta 17 sngi bad ki jait jinghikai kiba yn sa ai ha kane ka training ki dei, ka rukom shet ia ki jingbam Indian, ki jingbam Chinese bad ki jingbam tynrai. Kane ka training ka dei kaba la ju leh ha kiwei pat ki jaka hapoh ka thaiñ ha ki snem ba mynshuwa kum ha ka shnong Nongtalang, Amlarem, Nongbareh bad Darang.
Ha kane ka sngi la ioh ia ka jingkren na u Dr. H.H. Mohrmen uba la iathuh shaphang ka SURE, ki kam ba ka trei bad ka shaphang ka training ruh kumjuh. Naka liang jong u ma Lambor Suchen uba long u Skill Development Officer ula batai kane ka project ka wan ka ministry kaba dei peit ki thaiñ khappud bad la pyntreikam ia ka da ka ophis jong u SDO Amalrem, u DC bad ka Skill Development. U ma Daman Lakashiang uba long u Daloi jong ka Eleka Satpator ula pynpaw ia ka jingsngewnguh ba ka sorkar kala paitkhmat sha ka Eleka bad u ngeit skhem ba kane kan iarap khamtam ia ki samla ki bym pat iohkam iohjam. Iaka prokram la pyniaid da ka samla Ilasiewdor Gashnga kaba peit ia ka kam ai training hapoh ka SURE.Ki nongshim training kiba la wan iashim bynta ha kane ka sngi ki dei ki samla na ka shnong ba marjan kum na Amlari, Jong u chen, Amjalong, Nongtalang nalor ki shnong kiba hap hapoh ka Syndai kum ka Syndai kmai Shnong, Syndai Mission bad Syndai Lyngkot. Ha kane ka sngi la iadonlang ruh u Donbok Syndai uba long u Waheh Shnong ka Syndai Kmai Chnong bad ia ka jingbam sngi ha kane ka sngi la pynbiang da ka Kynjoh Shphrang SHG na Syndai Mission.
