Mynta ka sngi ka 20 Naitung, u MLA ka 19-South Shillong Constituency, u Bah Sanbor Shullai u la plie ia ki skhim bad ki projek pynroi bapher bapher kiba la buh thong na ka bynta ki paidbah jong ka constituency.
Ka jinglut baroh na ka bynta kine ki projek bad ki jingpynroi ka long T.16,02,83,796/- ia kine ki song pisa, la mynjur da ka tnat Development of North Eastern Region (DoNER), ka Sorkar Pdeng, ka tnat pynroi sor bad PWD ka Sorkar Meghalaya.
Ïa ki mawnongrim na ka bynta kine ki projek bad ki skhim la plie paidbah ha ka jingïadonlang ki Rangbah Shnong jong ki shnong hapoh ka South Shillong constituency, ki ophisar jong ki tnat bapher bapher, ki dkhot ka Raid Laban Sports Social and Cultural Club bad kiwei kiwei.
Kine ki projek bad ki skhim pynroi ki kynthup, ka jingshna bad pynroi ia ka cultural complex jong ka Seng Khasi Raid Laban ha Lumshatsngi, Upper Kench Trace ha ka jinglut kaba T.10 klur ba la bei tyngka da ka NEC, ban shna da ka surok feeder naduh ka jaka sah ka Kong (L) Broming Marbaniang kaba pyniasoh sha Wah Shyngiar haduh ïing sah jong u Bah D.J Wankhar Lumdorbar ha ka jinglut kaba T.3,03,08,000 ba la bei tyngka da ka PWD, ban shna ïa ka surok feeder naduh Wah Shyngiar haduh ïing sah jong u Bah James Ryndem ba la bei tyngka da ka PWD ha ka jinglut kaba T.1,38,63,000, ka jingshna jong ka aqueduct/slab cover drain na Lumdorbar haduh ka jaka sah jong ka Kong Hasina Thabah ha ka jinglut kaba T.91,61,000 ba la bei tyngka da ka PWD, ka jingshna ia ka surok naduh ka surok PWD kaba la don lypa haduh Oxford Hill, Kench’s ha ka jinglut ba T.19,14,000 ba la bei tyngka da ka PWD, ka jingshna ia ka surok motorable naduh footpath junction kaba leit sha surok PWD ha Riat Laban ha ka jinglut kaba T.22,52,248 ba la bei tyngka da ka tnat pynroi sor, bad ka jingshna biang ia ka lynti iaid kjat paidbah bad ka side drain sha Riat Laban ha Block B ka jinglut kaba T.27,85,548 ba la bei tyngka da ka tnat pynroi ka Sorkar Jylla.
Na ka liang u Bah Sanbor u la ong “Na ka bynta ki skhim bapher bapher jong ka sorkar pdeng, kum u MLA nga hap ban leit sha Delhi ban kyrpad iaki myntri ka sorkar pdeng ban pyllait noh ia ka pisa ba la thmu na ka bynta ka constituency bad kumjuh ruh na ka bynta ki skhim sorkar jylla, nga hap ban iakynduh ia u myntri rangbah ka jylla ban kyrpad ban pyllait ia ka pisa” la ong u Bah Sanbor.
U la iathuh ruh ba ka long kaba suk ban dawa ia ki projek bad ki skhim hynrei ka long kaba eh bha ban ioh ia ka pisa ban pyntrei iaki skhim bad ki project. U Bah Shullai u la pynpaw ka jingsngewnguh ïa baroh ki heh jong baroh ki tnad kiba la shimkhia ban pynkhreh ïa ki Detail Project Report (DPR) na ka bynta ki skhim bad ki projek bapher bapher kiba la buh thong na ka bynta ka konstitwensi jong u.