Shi bynta na ki lad ban pyniar shuh shuh ia ka pule puthi na ka bynta ki khynnah kiba dang khie dang san, u Block Development Officer ka Laskein C&RD Block, West Jaintia Hills u Dr. F.R Shadap ula plie ia ka Children’s and Adolescent Library and Digital ha ka shnong Mooshort ha kane ka 19 tarik mynta u bnai, ha ka jingdon ryngkat ka kong Weimonlangki Biam kaba dei ka Block Technical Assistant (BTA) jong ka Sahsniang Circle, Laskein Block.
Haba ai jingkren u BDO u la ong ba ia kane ka library la buh ryngkat ka jingpynwandur na ka bynta ki jingmyntoi jong ki khynnah kiba dang khie dang san da kaba pynioh ha ki ia ki tiar pule kiba katkum ka juk ba mynta. Kine ki jingdonkam kin iarap ban pun lynti ban kiew sha kawei pat ka rukum pule ka juk mynta ne ka Digital Literacy na ka bynta ki khynnah skul. U la ong shuh shuh ba ha kane ka jaka pule (Library) ki khynnah skul kin ioh ban pule ia ki jingtip kiba don shabar na ki kot pule ha ki skul bad kan pynshlur ia ka jingpule ba laitluid.
La ioh jingkren ruh na u Waheh Shnong ka Mooshort u ma Janai Suchiang, uba la ai ka khublei ia u BDO na ka bynta ka jingpynioh ia kane ka Degital Library kaba lah ban ai shibun ki jingmyntoi ia ki khynnah jong ka shnong. U la pyntip ba ka shnong Mooshrot ka don 508 tylli ki long iing bad ka jingbun briew kaba kot la kumno 3000 ngut, ula pynpaw ruh ia kiwei de ki kam pynroi kiba ka shnong ka dang donkam ban ioh, kumta u kynta ia ka tnad Block lyngba u BDO ba un sngewbha ban wad ki la jingiarap na ka bynta ki kam pynroi hapoh ka shnong.
Kiwei de kiba la ai jingkren ha kane ka jingialang ki kynthup ia ka kong Weimonlangki Biam, kaba dei ka BTA ka Sahsniang Circle, Laskein Block bad na u ma Romingstar Lamare, ba dei u Co-Adviser bad ia ka jingialang la pyniaid da u Jetison Tyngkan uba dei u Secretary Shnong.
Ka la don ruh ka jingshad tynrai kaba la shim bynta da ki dkhot jong ka Village Organisation (VO) ka shnong Mooshrot.
