Mynta ka sngi u Deputy Commissioner, East Jaintia Hills District, Khliehriat, u A. Baranwal, IAS u la plie paidbah ia ka dukan die mar (Grocery Shop Cum Rural Outlet) jong ka Iengskhem Village Organization ha Khliehriat West Community Hall, East Jaintia Hills District.
Ka jingthmu ka long ban iarap pyniaidiew ia ki mar ba la pynmih da ki Self Help Groups (SHGs) ba pher ba pher jong kane ka thaiñ.
Na ka liang u DC u la ai khublei ia u Waheh Shnong ka Khliehriat West u ba la ai jaka ban plie ia kane ka dukan bad kumjuh ruh ia ka kynhun jong ka Meghalaya State Rural Livelihood Society(MSRLS), East Jaintia Hills District ka ba la shimkhia ban pynurlong ia kane ka jingthmu.
Ha kane ka dukan kin don kumba 15 tylli ki SHGs ki ba lah ban wan buh bad die ia ki mar jong ki.
Ia kine ki mar ba la pynmih da ki SHGs lah ruh ban peit lyngba ka District Website (https://eastjaintiahills.gov.in) bad ki nongthied ki lah ban thied beit beit da kaba phone ha ki number jong ki dkhot ki SHGs.
Ha kane ka sngi la ioh jingkren ruh na u ma K. Slong, District Programme Manager, NRLM; ha ka jingiadonlang u Dr. T. Shylla, Block Development Officer, Wapung C& RD Block, ma L. Bareh, Waheh Shnong Khliehriat West, ma J. Dkhar, Ex- MLA bad ki dkhot jong ki Self Help Groups (SHGs).
