Hynnin ka sngi u Dr. Wanwei Roy Kharlukhi uba long ruh u Member Parliament (Rajya Sabha) u la hiar sha shnong Muroh, West Jaintia Hills District ban wan plie ia ka ïingskul Dewbilat kaba heh jong ka Christ School Mukroh kaba la tei da u Dr.Henry Lamin kaba la ainam ha ka kyrteng i Mei jong u ka Christina Lamin, kaba la shu ai kyrteng lyngkot “Christ School Mukroh” hapdeng ka jingiphuh iphieng da ka jingwan sakhilang ki kmie ki kpa jong ki khynnah skul bad ki paidbah na ki shnong kiba marjan wat hapdeng ka jingmaham jong ka suiñbneng ban pynhap ia u lap mynsaw.
Ha shwa ban plie la pynlong ia ka jingialang bad ka jingpdiang burom ia u Dr. Kharlukhi uba long u kongsan ha kane ka sngi da ka kong Embhahlang Lamin, Headmistress ka skul, ia ki riewkhmat bad ia baroh kiba la shah khot sngewbha da ka Welcome song bad ki kyntien jingrwai kiba don jingmut bad kiba shoh mynsiem ia baroh ki nongwan ba la ai da ki nonghikai jong ka skul.
Ha shwa ban ioh ia ka jingkren bad ka sneng ka kraw na u Dr.W.R.Kharlukhi MP Rajya Sabha, la ioh ia ka kyntien waiphang da u Dr. Henry Lamin, u nongseng ia kane ka skul. U Dr. Henry Lamin haba kren ha kane ka sngi, u ong ba ka jingplie bad tei ia kane ka iingskul ka long kum ka dak ka jingieid, ka jingburom bad ka jingpynsahnam iala i mei iba pun iba kha iba pynheh pynsan bad pynnang pynstad ia u kumba u long mynta bad ia ki para jong u wat hapdeng ka jingduk tasam. Ha ka juh ka por u Dr. Lamin u ong ka jingplie ia kane ka skul ha shnong Mukroh ym tang ban pynsahnam iala i mei ban ai ruh ka jingnang jingstad ia ki Nongshong shnong ka Mukroh ia ki shnong kiba marjan bad khamtam ia ki khynnah jong ka thaiñ Labang-Nongphyllut, Elaka u Doloi Nongphyllut, ki nongshong shnong kiba dangsahdien tam ki bym don hapoh kano kano ka jingpeit jong ka sorkar bad ki bym pat iohmad ia u soh jong ka jinglaitluid bad ka jingnang jingstad wat hadien ki hynniewphew san snem kiba ka Ri India ka la ioh ia ka jinglaitluid na ka jingsynshar ki Phareng.
U Dr. Kharlukhi u kongsan haba kren ha kane ka sngi u pynpaw ia ka jingkmen haba u la ioh ia kane ka lad ban wan plie ia kane ka iingskul Dewbilat kaba heh jong ka Christ School Mukroh, kaba u Dr. Henry Lamin nalor kaba la plie ia ka skul bad tei iakajingtei ban pynsahnam iala i jong i Mei, u la kyntiew ia ka roi ka par kane ka thaiñ kum u MLA ha ki snem kiba la leitnoh bad mynta u la ai ia ka jingshakri kaba bha tam bad kata ban kyntiew ia ka jingnang jingstad. U Dr. Kharlukhi haba kren ha kane ka sngi u khot ia ka jingiatreilang ki nongshong shnong, ia ki shnong ba marjan ban iatreilang bad u Dr. Henry Lamin ha kaba iatreilang ban iasnoh kti lang bad u Dr. Lamin ba kane ka skul kan nangiaid shaphrang ha ki por bad ki snem ki ban dangwan bad ai ba kane ka jingthmu jong u Dr.Lamin kan dei ban kut tang ha ka Upper Primary, kan nangkiew sha ka Secondary bad ka College ban ai ka jingnang jingstad ia baroh khamtam eh ia ka jaitbynriew ba kan nangiaid shaphrang ha ka jingstad ka juk mynta. Nangta u ong ba ialade hi shimet un ai ka jingiatrei lang bad u Dr. Lamin katba shong ka buit ka bor ha ka ban ia pyniaid ia kane ka skul ba kan nangiaid shaphrang.
Kham ha shwa la ioh ia ka jingkren kyntu kynpham bad ka jingai mynsiem ia u Dr. Henry Lamin da u ma Aiborlang Shadap uba long u MDC kane ka thain,na u ma Baristar Niang BDO,C&RD Laskein Block bad na u Rev.Fr.John M Marboh, Parish Priest jong u Khrist U Syiem Barato Parish. Ia ka jingialang la pyniaid da u Dr. Melinus Lamin bad ia ka jingkren ai khublei khublei (Vote of thanks) da u ma Romeo Lamin, Secretary ka Christ School Mukroh.
