Hynnin ka sngi u Myntri jong ka sorkar jylla u ma Kyrmen Shylla u la wan ban plie pyrda ia ki ar tylli ki madan Futsal ha Khliehriat ia kiba la bei pisa da ka District Mineral Foundation (DMF) Fund, East Jaiñtia Hills District.
Kine ki ar tylli ki madan ki dei kiba don kawei ha Khliehriat West bad Khliehriat East villages. Ha kane ka sngi plie pyrda ha Khliehriat West la iadon lang u Deputy Commissioner, East Jaintia Hills District, u A. Baranwal, u MDC ka Rymbai Khliehriat u ma Finelyness Bareh, ki riew rangbah jong ka Khliehriat, ki dkhot jong ka Khliehriat West Sports Club bad ki nongshong shnong ka thaiñ.
U ma Kyrmen u la pyntip ba ha ka Phase ba nyngkong ki don haduh 5 tylli kum kine ki madan kiba la mang hapoh ka District, hynrei la lah ban pyndep shwa ia kine ki ar tylli bad ia kiba dang sah yn sa pyndep pat kham hadien.
Ha kane ka sngi na ka liang u ma Kyrmen u la noh synniang Rs.5 Lak tyngka na ka MLA skhim na ka bynta ba ker fencing ia ka madan ialehkai football jong ka Khliehriat West.
Na ka liang jong u DC u khot lang ia ki nongshong shnong ba kin pyndonkam hok ia kane ka mada, khnang ba yn lah ban pynmih ia ki nongialeh kiba tbit napoh kana ka District, ki ban iakhun ha ki jingiakop bapher bapher.
