U ma Kyrmen Shylla uba long ruh u MLA ka Khliehriat u la wan ban plie ia ka Horticulture Collection Center kumjuh ruh ia ka office Building jong ka Maitlynti Rural Development Society (MRDS) ha ka shnong Bataw East Jaintia Hills District, ha kane ka sngi thodieng ba la lah, ha ka jingiadonlang ka kong H. Suchiang, District Horticulture Officer (DHO) EJHD, G. Warjri ADC EJHD, ma Tammiyaki Shylla BDO Wapung C&RD Block, EJHD, ma Shemi Rupsi Waheh Shnong Bataw ki paidbah nongrep ka thain bad kiwei de.
U ma Deihok Sumer General Secretary MRDS, u la ong ba ia kane ka Society la seng ia ka ha ka 5 tarik Risaw, 2019 bad ka thong jong ka, ka long ban kyntiew ia ka rep ka riang bad kumjuh ka jingnang jingstad ha ka shnong ka thaw bad ka thaiñ hi baroh kawei, hynrei ka la buh ka thong kaba hakhmat eh ka long ban kyntiew ia ka kam rep kam riang bad ha ka jingiadei bad kane da ka jingiarap jong ka ophis ka DHO Khliehriat ki lah ban wan rah ne tei ia kane ka Horticulture Collection Center kaba ki la sdang ban tei naduh u snem 2020.
Shuh shuh u la ong ba ka jingdon kane ka Center kan ai jingiarap shi bun ia ki nongrep namar lada ki nongrep hi kin leit die dalade kan shem jingeh ia ki ha ka bai kit bai bah ban leit die sha ki iew ki hat kiba jngai ha kaba don ka por tang ka bai kali ruh kim lait hynrei da ka jingdon kane ka Center ki nongrep ki lah ban leit buh ia ki hangne bad ka Society pat kan pyniaid iew ia ki mar jong ki.
U ma Kyrmen haba kren u la iaroh ia kane ka Society da ka jingkular ban wad ki lad ki lynti ban wan rah ka jingmyntoi shuh shuh ha ki nongrep ha kane thaiñ kumjuh ruh ia baroh hi kawei kane ka District, u la ong ruh ka jingdon kum kane ka Society kan wan rah shi bun ki jingmyntoi ia ki nongrep ha kaba ia dei bad ka dor jong ki mar rep bad ka bai kali.
Na ka liang ka DHO East Jaintia Hills District, Khliehriat ka kong H. Suchiang, ka la kyntu ia ki nongrep ban wan mih sha ka ophis ha kano kano ka por ba ki don kam jingiarap ha kaba na ka liang ka ophis kan lah ban ai ki jingiarap ia ki katba don ki jingrap kiba ka ophis ka lah ban ai na ka bynta ki nongrep.
Ha kane ka sngi la ioh ruh ki jingkren na u ma G.S. Pala Functional Manager, ma Skhem Sumer Assistant Waheh Shong, ma Shemi Rupsi WS Bataw bad kiwei de.
