U Myntri jong ka sorkar jylla uba dei peit iaka tnad Revenue & Disaster, Social Welfare bad kiwei de hynnin ka sngi ula plie ia u mawnongrim ban tei ia ka surok bala tip kum ka Rymbai-Borghat-Jalalpur Road (RBBJ) ha ka jingialang kaba la long ha madan jong ka shnong Bataw East Jaintia Hills District.
Ha kane ka sngi la wan ban iadonlang naduh u MLA ba rim ma Justine Dkhar, ki nongialam shnong na ki 9 tylli ki shnong kiba kynthup ïa ka Bataw, Umsatai, Lad Wahwapung, Pynurkba, Diensatlang, Umlyngsha, Lakadong, Umlakdoh, Lakadong Ummat bad ka Lad Lakadong, nalor ki MDC, ki ophisar na ka PWD, ki nongialam ka Jaintia Student Union (JSU) lem bad kiwei de.
La pynsngew ba ka jingshna ia kane ka surok ka jngai kumba 30 kilo miter lyngba ka skim jong ka Rehabilitation of Damage Pavement including MBT of RBBJ Road ha ka jinglut (Sanction) kaba la kot T. 23,93,50,000 tyngka.
Na ka liang u ma Kyrmen Shylla haba ai jingkren ula pynpaw ka jingsngewkmen ba la lah ban pynurlong ia kane ka jingangnud kaba ula thrang la slem bha. Ula iathuh kum u nongmihkhmat ula pyrshang katba lah ka bor ban iakren ha ka ban shna thymmai noh ïa une u surok da kaba leit ban aiti ia ki dorkhas man ka por sha u Myntri Rangbah bad kumjuh sha u myntri ka tnad PWD.
Ka jingsngewkmen ba kane ka jingdawa kala urlong long bad kan sa long shisha ka jingmyntoi kaba khraw eh ia kitei ki khyndai shnong bad kumjuh ia ki nongrep ba pynpoi ia ki mar ki mata jong ki ong u ma Kyrmen,
Shuh shuh ula ong ruh kila don shibun ki surok kiba ula dep ban pyntrei naduh ba ula long kum u MLA jong ka Khliehriat, da kaba u ong ruh ba kane ka dei ka kol kaba khadduh jong kane ka somoi, na ka liang jong u ruh u kular ban un dang ïaitrei khambha shuh shuh ïa ka Constituency hi baroh kawei.
La pynshnong shit shuh shuh ia kane ka sngi da ki jingrwai na uwei ki kaitor ba paw u Banker Kharkangor bad kumjuh ka jingshad tynrai na ka Village Organisation ka Bataw.
