U Ma Nujorki Sungoh uba long u MLA ka 4 – Mowkaiaw Constituency, mynta ka sngi u la plie ia ka Barato Police Out Post, ha ka shnong Barato ha West Jaintia Hills District. Ha kane ka jingwan plie ia kane ka Police Out Post la don lang ruh u Deputy Commissioner ka WJHD u bah B.S. Sohliya, IAS, u Superintendent of Police u Bikram D. Marak, u MDC ka thaiñ u ma Aiborlang Shadap ryngkat ka jingwan sakhilang ki nongshong shnong.
U Superintendent of Police Bikram u D Marak, haba kren u la ong ba ka jingbuh ia kane ka Out Post ha kane ka shong Barato kaba dei kawei na ki shnong ba don ha jan ki jaka khappud kan ai jingiarap shibun ki nongshong shnong kane ka thaiñ ha kiba bun liang khamtam ha ka jingiada na ki kam sniew kam thiem bad kan ai jingshngaiñ ruh ia ki briew ka thaiñ ha ba don kino kino ki jingjia, khamtam kane ka thaiñ ka ba juh don shibun ki jingjia ba pynsyier mynsiem ia ki nongshong shnong.
U Deputy Commissioner u bah B.S Sohliya, haba kren u la ai jingiaroh ia ka tnat home Department kaba la lah ban wan rah ia kane ka outpost ha kane ka shong kaba ka shnong ka la kyrmen ban ioh la slem.
U Ma Nojorki u MLA ka thaiñ haba kren u la pynpaw ba u dap da ka jingsngewkmen kaba khraw haba u la ioh ban plie ia kane ka POP kaba ki paidbah ki la khmilynti mynta la kumba 20 tam ei ei, da kaba u ong ba ka jingplie ia kane ka POP kan wan rah shibun ki jingmyntoi ha ka jingiadei bad ka jingshongsuk shongshngaiñ bad ka jingshngaiñ jong ki paidbah kane ka thaiñ.
Mynta ka sngi ia ka jingialang la pyniaid da ka DSP Women kong Lyngdoh bad la ioh ruh ki jingkren na u Waheh Shnong Barato, ki jingkren na u ma H.T Well Sten uwei na ki riew rangbah ka shnong Barato, ma Stelin Lamare bad kiwei de.