Ka Jaiñtia Hills Development Society (JHDS) kawei na ki kynhun treimon sngewbha hapoh ka imlang ka sahlang, mynta ka sngi kala ïoh ban plie ïa ka jaka ai jinghikai ha ka kam suhjaiñ ba 60 sngi lynter na ka bynta ki 30 ngut kynthei hapoh katei ka Society kaba don ha Bishop House Lumbih Syntu Mihmyntdu.
Ha shwa kane la don ka jingïalang ba la pynïaid ha Samanlang Socio-Cultural Pastoral Center Jowai Diocese ba la pynïaid da u Denis Kurkalang Programme Coordinator JHDS, ïa kane ka jaka ai jinghikai la wan ban plie da u kongsan uba dei ruh u MLA ka 2-Jowai Constituency ma Wailadmiki Shylla, ha ryngkat ka jingdonlang u Fr. Manbha Pakem Director JHDS, u bah Grevile Kharlikhi Asst. General Manager NABARD, u ma Lambormi Suchen, Skill Development Officer, u Fr. Ferdinand Dkhar Diocesan Administrator Jowai nalor kiwei de kynthup ïa kiba shah hikai lem bad ki nongtrei ka JHDS.
Ïa kane ka prokram ai jinghikai la ïarap ban kyrshan lang da ka ‘Khublei Germany’ ha ryngkat ka jingïarap pisa jong ka National Bank for Agriculture and Rural Development (NABARD) Shillong.
Na ka liang u kongsan haba ai jingkren ula ai ka jingïaraoh ïa ka JHDS kaba la don bynta ban ai ka jingshakri ha kiba bun ki liang, ula kyntu ïa ki khun samla ba kin pylleit jingmut ban ïeng hala ki jong ki kjat da kaba seng ïa ki kam la jong bad ban pynjanai shuh shuh ïa ka kam ba ki trei.
Ula pynsngew mynta ka long kaba eh ïa baroh ki khun samla ban ïoh ïa ka kam sorkar bad u buh ka jingkyntu ïa ki samla ba kim dei ban shañiah tang ha ka kam sorkar namar wat ka kam la jong ruh ka dei ka lad kaba lah ban pyndap pynbiang ïa ki jingdonkam.
Hadien kane ka sngi u kongsan ma Wailad ula khap ruh ïa u ribon jong katei ka jaka ai jinghikai suhjaiñ kaba don lang ïa ki kor suhjaiñ kaba la sdang ban treikam naduh mynta ka sngi ka ban neh haduh ar bnai lynter.
U kyrmen skhem lyngba kane ka shlem ai jinghikai kan long ka jingïarap kaba khraw eh ïa kiba shah hikai ban ïoh pyntbit ha kane kam bad ki lad jingtip kiba lah ban ïoh na kane ka jaka ba ai jinghikai. Ïa ki kyntien pdiang sngewbha ha kane ka sngi la ïoh na ka Mandakini Nongtdu, Coordinator FARM, katba ïa ki kyntien ai khublei la ïoh na ka samla Angeline Lamare, Counselor Childline Jowai.
