Ka Faith Academy Secondary School, Jowai mynta ka sngi kala pynlong ïa ka prokram ‘Cultural Day’ ne ka jingpyni nam ïa ki tiar ki tar jong ki longshwa manshwa halor ka phang kaba ong “My Culture My Pride”, ïa kane ka prokram la pynlong ha katei hi ka skul.
Ha kane ka sngi ki khynnah skul kiba wanrah shibun ki tiar ki tar jong ki longshwa naduh ki jingthaiñ ba bun jait, ki jait jingbam, ki tiar tem bad nalor kiwei de ki jingshna tynrai kiba la pyndonkam da ki lai tylli ki jait bynriew jong ka jylla Meghalaya kiba kynthup ïa ki Khasi, Jaiñtia bad Garo.
Ïa kane ka prokram la wan ban plie da u kongsan ma A. Andrew Shullai, MDC, Jowai Central ha ryngkat ka jingdonlang u Chairman & Administrator ka skul ma Aris J Nongkynrih, ka Headmistress, kong P. Jana bad ki dkhot jong ka School Managing Committee.
La pynïaid ïa ka jingïalang da ka kong S. Suna, katba ka Hedmaster jong ka skul kala ai ki kyntien pdiang sngewbha ïa baroh kiba la poi sha kane ka prokram bad khamtam eh ïa ki kmie ki kpa jong ki khynnah skul.
Katba u Chairman & Administrator ma Aris J. Nongkynrih, ula pynsngew halor ka jingdonkam ban pynneh pynsah ïa ki dustur la jong, khnang ban pynpaw pyrthei shuh shuh halor ka jingriewsphah jong ka jaitbynriew, ula ong kane ka long ruh kum ka lad ban ai jingtip sha ki khynnah skul ba kin shim ïa kane ka bynta kaba kongsan haka jingim namar ki long kiba la ai kyrpang da ka mei mariang.
Na ka liang u kongsan ma A. Andrew Shullai, haba ai jingkren ula ai khublei ïa ki bor pynïaid jong kane ka skul kiba la trei shitom ban pynlong kum kane ka prokram ‘Cultural Day’, ha ka juh ka por kane kan ïarap ban pynkiew ïa ki jingdon jingem jong ki riti ka dustur, ula ong ha kane ka pyrthei jong ki bor ka juk stad mynta ka pyrthei kala long kaba rit haduh katta katta, hynrei kum ka jaitbynriew pat dei ban pynneh pynsha ïa ki dustur jong ki longshwa bad kumjuh ïa ka jingim kaba don “ka akor ka burom”.
