Ia ka 29th IASLIC National Seminar la pynlong da ka Central Library, NEHU Shillong ha ryngkat ka jingiatreilang bad ka Indian Association of Special Libraries and Information Centres (IASLIC), Kolkata ha kaba u MP jong ka Rajya Sabha u Dr. W.R. Kharlukhi ula long u kongsan ban wan plie ia kane ka Seminar kaba la pynlong ha Multi-Use Convention Hall, NEHU Campus, Shillong hynin ka sngi (15/03/2023), ha ka jingiadon ryngkat u Prof. Prabha Shankar Shukla, Vice-Chancellor ka NEH ha ryngkat ka jingiadon kiwei de ki kynrem ki lyndan.
I Dr. F.R. Sumer, University Librarian, NEHU & Organizing Secretary ila ai ka jingkren pdiang sngewbha ia baroh. La ioh ruh ia ka jingrwai pdiang da ki Research Scholars jong ka Department of Library & Information Science, NEHU.
U Abhijit Kumar, General Secretary, IASLIC ula ai ka jingkren lamphang halor ka mat pdeng jong kane ka Seminar, bud sa ka jingkren da u Prof. Sanjay K. Singh, Vice President, IASLIC Zone 5.
U kongsan Dr. W.R. Kharlukhi MP Rajya Sabha ula pyllait paidbah ia ka kitab lum thup jong kane ka Seminar bad plie pyrda ia kane ka IASLIC National Seminar ba 29, ha kaba ula kitbok ba kane ka Seminar kan long kaba jop. Ula pyntip ruh ba yn sa thaw ia ka Museum ha Garo Hills bad pan ia ka jingai jingmut na ka Central Library, NEHU, Shillong ban pyniaid shakmat ia kane ka jingthmu.
Na ka liang jong u Prof. PrabhaShankar Shukla, Vice-Chancellor, NEHU uba pyniaid ia kane ka prokram ula pdiang sngewbha ia baroh kiba shah khot sngewbha bad ruh ia ki nongiashim bynta ha kane ka Seminar.
Ha kane ka juh ka sngi kala don ruh ka jingsam ia ki khusnam jong ka IASLIC Special Award sha ka T. Padmavathi, Pr. Tech officer, FOSTIS/Library CSIR-Central Food Technol. Res. Institute (CFTRI), Mysury 20, India, kum ka jingkynmaw ia ka jingshakri jong ka ha ka kam Library.
La ioh ia ki kyntien ai khublei na i Dr. (Mrs) J.J. Thabah, Assistant Professor, Department of Library & Information Science, NEHU, Shillong.
Kum shibynta ban kyntiew ia ka jingpynneh pynsah ia ka mei mariang la pynlong ia ka jingthung dieng ha phyllaw jong ka Multi-Use Convention Hall da ki riew paw khmat kiba la poi sha kane ka prokram.