Ka Medusind kawei na ki kompani ba paw jong ka ri US kaba peit ia ka koit ka khiah jong ki briew, ka sngewsarong ban pynbna ba la plie ia ka ophis treikam ba thymmai jong ka ha nongbah Shillong hapoh Shillong Technology Park ha kane ka 14 tarik mynta u bnai. Ia kane ka ophis thymmai la wan ban plie da u Myntri Rangbah ka jylla u Conrad K Sangma, ha ka jingiadon lang i Kranti Menje, CHRO bad Nanad Chavda u CFO na ka Medusind.
Na ka liang jong u MR ula pynpaw jingsngewkmen ban iohi ba kane ka Medusind kaba dei ka kompani IT and ITES Healthcare Organization ba ka lah ban pynrungkam ia shibun ki samla hapoh ka jylla. U kyntu ruh ia kane ka kompani ba kan pynrung kam shuh shuh ia ki khun samla lyngba ka ophis treikam jong ka kaba la plie ha kane ka jylla. U Sangma u don ruh ka jingthrang ba kiwei pat ki kompani kin bud nuksa na ka Medusind ban buh ia ki jaka treika jong ki ha nongbah Shillong khnang ba kan pyniohkam ia kiba bun ki khun samla ka jylla.
Kane ka kompani ka don haduh 4000 ngut ki nongtrei ha kylleng ki bynta jong ka ri India bad USA. Ka jingplie ia kane ka ophis treikam ha nongbah Shillong ka dei kawei na ki kular jong kane ka kompani ban pyniar ia ka jingtreikam hapoh ka ri India. Tang hapoh 6 bnai kane ka kompani ka la lah ban pynrungkam haduh 450 ngut ki samla.
