U Myntri ka tnad ka koit ka khiah u ma Wailadmiki Shylla mynta ka sngi ula plie paidbah ïa ka Health ATM Machine ha Jowai Civil Hospital, Ialong bad kumjuh ïa ka MHIS Pharmacy ka ban treikam baroh 24 kynta.
Hashwa kane la don ka jingïalang bala wan ban donlang da ka Director of Health and Family Welfare (MI) Dr. J. Momin, u Deputy Commissioner ka West Jaiñtia Hills u Abhinav Kumar Singh, IAS, ka District Medical and Health Officer Dr. P. Shylla, u Medical Superintendent Dr. W. Lakiang, ki doctors bad ki staff nurse jong Jowai Civil Hospital, Ialong.
La pynsngew ba kane ka Health ATM Machine ka dei ka tiar sumar kaba biang bha ban leh ïa ki test kiba bun jait kum ka Blood Pressure (BP), ka Shini, ka jingthew shit bad jingkhriat jong ka met, ka ECG, ka SpO2, ka Hemoglobin bad kiwei de ki jingthew ba donkam ha ka koit ka khiah. Ïa kane ka mashin la thied ha ka jinglut kaba T.3.8 lak hapoh ka CM-Catalytic Fund.
Naka liang u ma Wailadmiki Shylla haka jingkren ula ong ba kane ka Health ATM machine kan ïarap ban pynduna ïa ka jinglut jingsep haka rukom ai jingsumar ïa ki nongpang namar ba ïa ka Report lah ban pynmih hapoh 10 minit. Kumta u kyntu ïa ki paidbah ba kim dei ban shaniah tang ha kane ka mashin hynrei ki dei ban leit wad jingmut shwa na ki doctor.
Shuh shuh u myntri ula ong lada ka rukom treikam jong kane ka mashin ka long kaba jop bad kaba myntoi ïa ki paidbah, kum kane ka mashin yn sa buh ha kiwei pat ki Health Centre ba kynthup ïa ki CHC bad ki PHC.
Ha ka juh ka por u Myntri ula pynpaw ka jingsngewkmen halor ka jingplie ïa ka Pharmacy kaba treikam 24 kynta ha katei ka Hospital, da kaba kdew ruh ba ka dei ka Pharmacy sorkar kaba ar hapoh ka jylla ka ban treikam baroh shisngi.
Ha kane ka juh ka sngi la aiti ruh ïa ki work order na ka bynta ban tei ïa ki Health Sub- Centre kiba thymmai ha Ialong bad Sabahmuswang ban kyntiew shuh shuh ïa ka jingshakri paidbah ha ka liang ka koit ka khiah.
La pyntip ba ïa ka Sub-Centre kaba don ha Ialong yn shna ha ka jinglut kaba Rs. 55.50 lak tyngka, katba kaba ha Sabahmuswang ka long Rs. 55.05 lak tyngka.
Kum u MLA ka thaiñ u ma Wailadmiki ula ai khublei kyrpang ïa ka jingtrei shitom jong ki nongtrei ka koit ka khiah ha baroh ar tylli ki District jong ka West bad East Jaiñtia Hills, kila la aiti lut ban pynduna ïa ka jingïap jong ki longkmie bad ki khunlung hapoh ka District.
Ha kane ka sngi u Myntri ula lum ruh ïa ka jingïalang bad ki ophisar ban pynbha shuh shuh ïa ka tnad ka koit ka khiah jong ka West bad East Jaiñtia Hills District naduh ka jong don ki nongtrei, ban pynbiang ïa ki dawai dashin bad kiwei de ki jingdonkam.
Katba na ka liang u Deputy Commissioner ka WJHD u Abhinav Kumar Singh ula ong ka jingplie ïa kane ka mashin kan ai jingmyntoi shibun eh ïa ki paidbah namar ka lah ban leh haduh 60 tylli ki jait test bad kaba pynduna ruh ïa ka jinglut jingsep jong ki briew kiba duna haka ïoh ka kot.
U Dr. W. Lakiang uba dei u Medical Superintendent ka JCH ula kdew ba kane ka mashin kan ïarap ban pynduna ïa ka jingbun kam jong ki nongtrei ka Hospital bad ula pyntip ïa kane ka mashin yn peit bad pyntreikam da ki arngut ki Nurse kiba la shah pyntbit ha kane ka kam.
