U myntri ka kam ïalehkai Sports jong ka sorkar jylla u bah Shakliar Warjri mynta ka sngi 13 tarik Kyllalyngkot, 2025 ula wan ban plie pyrda ïa ka jingpynkhreh ban pdiang ïa ka 6th Meghalaya Games 2025 ka ban pynlong ha Jowai West Jaiñtia Hills District, ha ka jingïalang bala pynlong ha District Library Auditorium Mynthong.
Ha kane ka sngi la donlang da u MLA ka Jowai Constituency ma Wailadmiki Shylla uba dei ruh u Chairman ka MUDA, u Working President ka MSOA bah John F. Kharshiing, ka kong Matsiewdor War Nongbri (IAS), u DC ka WJHD bah B.S. Sohliya IAS, ki ophisar sorkar jong ki tnad bapher bapher nalor ki nongïalam shnong bad ki paidbah.
Na ka liang u kongsan ula pyllait paidbah kumjuh ïa ka Theme Song Video jong ka 6th Meghalaya Games 2025, kumjuh ruh ula pyllait ïa u Mascot haka dur bula jong u khla thapsim clouded leopard, ïa uba la ai kyrteng ‘U KIANG’.
U kongsan haba ai jingkren ha kane ka sngi ula ong ka jingpynlong ïa ka Meghalaya Games manla u snem kata naduh u snem 2021-2025 kala long ka jingmyntoi kaba khraw eh ïa ka jylla na ka bynta ban pynkiew shuh shuh ïa ka kam ïalehkai Sports lyngba ki khun samla.
Shuh shuh ula ong kane ka jingpynlong ïa ka Meghalaya Games ka long ruh shi bynta ban pynkhreh ïa ka jingwan jong ka National Games hapoh ka Jylla ha kine ki snem ban wan, da kaba ong ka sorkar jylla kala mang ban pynlut shibun ka pisa na ka bynta bantei ïa ka lawei jong ki khun samla kiba dei ki rangïalehkai ba kin lah ban pynpaw pyrthei ïa ki sap ki phong jong ki haki kam ïalehkai Sports.
Ha kaba ïadei bad kane ka jingpynkhreh ïaka Meghalaya Games ka sorkar kala pynshna kyrpang ïa ki jingtei bad ki jingairong da kaba leh ha ïing skul, ki College bad ki Dorbar Hall jong ki shnong bad kane ka long shi bynta ban ïarap ban kyntiew ïa ka kam Sports da kaba pyndonkam ïa kitei ki ïing Building.
U kyrmen skhem da ka jingdon kum kine ki lympung kim mih ki khun samla kiba kyrpang na ka jylla haka kam ïalehkai Sports bad kin sa ïoh ruh ban ïashim bynta wat shaduh ki Olympic jong ki ri ka pyrthei. Uai ruh ka jingkitbok kitrwiat ba kane ka 6th Meghalaya Games kan long kaba jop.
Na ka liang u ma Wailadmiki Shylla ula ai ka jingïaroh ïa baroh naduh ki ophisar jong ka District, ki nongïalam shnong bad ki paidbah kiba la treilang ban pdiang sngewbha ïa kane ka 6th Meghalaya Games 2025, da kaba ai jingïaroh ïa ka sorkar jylla khamtam ïa ka tnad Sports and Youth Affairs kaba la pynlong ïa kane ka lympung hapoh ka District.
Ula ong ‘Ka jingwan jong ka 6th Meghalaya Games 2025 kala long ka jingkyrkhu kaba khraw eh ïa ka sor Jowai namar shibun ki skim pynbha pynmiat hapoh ka Constituency dang ha kine ki khyndiat bnai ba la dep ban pynkhreh ïa ki.
La pynphuh pynphieng ïa kane ka sngi da ka jingrwai na ka kynhun rwai jong ka Elev8 Tribes Choir, katba ïa ki kyntien ai khublei la ïoh na u bah Finely L. Pariat uba dei u General Secretary ka MSOA.
Ha kane ka Meghalaya Games kaba 6 kan kynthup ïa ki 29 tylli ki jait jingïalehkai ki ban long naduh ka 20 tarik haduh ka 25 tarik Kyllalyngkot, 2025, ha kaba ar tylli ki jingïalehkai kin long ha nongbah Shillong, ka Swimming ka ban sa pynlong ha Caroline Swimming Pool, Shillong bad ka Golf ha Assam Rifles Golf Course, Laitkor.
Ki jingïalehkai ba dang sah Archery, Arm Wrestling, Athletic, Badminton, BasketBall, Boxing, Cycling, Football, Gymnastic, Judo, Karate-Do, Kho-Kho, Muay Thai, Shooting, Softball, Sports Climbing, Table Tennis, Taekwondo, Lawn Tennis, Volleyball, weightlifting, wrestling, wushu, ki jingïalehkai tynrai kum ka Rool Ball, Yogasana bad ka Lawn Bowling yn sa pynlong ha ki jaka bapher bapher jong ka nongbah Jowai, Wahiajer bad Khliehtryshi jong ka West Jaiñtia Hills District. Ha kaba baroh ki nongïashim bynta ki long la kumno kumno 3899 ngut.
