U Myntri ba dei peit ïa ka tnat Cooperation u ma Comingone Ymbon mynta ka sngi ula plie ïa ka jingsdang jong ka jingrakhe ïa ka taiew jong ka All India Cooperative Week celebration ba 70, kaba la pynlong ha madan Moosyiem ha shnong Shangpung, West Jaiñtia Hills District.
Ka mat pdeng jong kane ka jingrakhe mynta u snem ka long “Role of Cooperative Marketing India a five trillion Dollar Economy and Sustainable Development Goals”. Ïa kane ka jingrakhe la pynlong da ka tnat Cooperation Department, Government of Meghalaya Registrar ha ka jingïatreilang bad ka Meghalaya Cooperative Apex Bank Ltd and Rural Finance, Shillong, ka Meghalaya Livelihoods and Access to Markets Projects (Megha-LAMP) bad ka Meghalaya Basin Management Agency (MBMA)
Ka phang mynta ka sngi ka long “Recent Development in Cooperatives.”
Haba kren ha ka jingïalang u ma Comingone Ymbon ula kdew ia ki jingdonkam ban pynkhlaiñ shuh shuh ïa ka jingthaw ne seng ïa ki Cooperative. U pynshlur ïa ki dkhot jong ki Cooperative baroh ban long kiba trei shimkhia bha ban pyntrei ïa kino kino ki projek kiba la pynïoh da ka sorkar ha ka lynti kaba dei. U buh ka jingkyntu ïa ki kmie ki kpa bad ruh ïa ki khun samla kiba don hapdeng ka jingwad ïa ki jingtrei jingktah ban kin phai jingmut na kaba khmih lynti palat ïa ki kam sorkar hynrei ban phai sha ki kam lajong.
U Myntri ula pynkynmaw ruh ba dang shen ka sorkar kala pyllait ïa ka skhim ba la tip kum ka CM-Elevate, ha kaba ki nongsengkam la jong ki lah ban pan ïa ki skhim bapher bapher kum ka jingkyntiew ïa ki kam jngohkai, ka kam rep kam riang, ki kam pynbyrngia bad ha kiwei de ki bynta jong ka jingïohkam ïoh jam.
U la bthah ruh ïa ki sahep sorkar jong kane ka tnat ba kin long kiba kloi ban ai jingpynsngewthuh sha ki nongwan pan jingmyntoi.
Kiwei de kiba la ïadonlang ha kane ka prokram ki kynthup ïa u bah W.K. Kharbuli, Additional Deputy Commissioner, West Jaintia Hills, kong R C Sohkhlet, IAS Registrar Cooperative Societies, Meghalaya Shillong, MD Meghalaya Cooperative Apex Bank, ki nongtrei jong ka Cooperation Department, Megha- LAMP, MBMA bad Meghalaya Cooperative Apex Bank Ltd lem bad kiwei de.
