Shi bynta ban pynmih pisa ia ka Shilliang Myntang Presbyterian Secondary School, mynta ka sngi u myntri ba dei peit ia ka tnad PHE u bah Renikton Lyngdoh Tongkhar ula wan ban plie ia ka fete jong ka skul ha ka jingialang ba la pynlong ha madan bol hajan ka LP School jong ka shnong.
Ia ka jingïalang la pyniaid da u TBn P.J Talang ha ka jingdonlang MLA ka 4-Mowkaiaw ma Nujorki Sungoh, u Eleazer Christopher Dkhar President ka UDP Mowkaiaw, Dr. H.D. Talang, Waheh Shnong ma B. Lamare, u MDC ka thaiñ ma R. Tang ki nonghikai bad ki khynnah skul.
Na ka liang u kongsan bah Renikton Lyngdoh Tongkhar haba ai jingkren ula kitbok kitrwiang ia ki bor pyniaid jong kane ka skul ba kin nangiaid sha khmat ha ki liang baroh na ka bynta ban pynkiew ia ka skul hi baroh kawei. Haka juh ka por u myntri u kyrmen skhem ba kane ka fete kan lah ban pynmih pisa ia ka skul ba kan ioh ban pyndap ia ki jingdonkam.
Ula pynsngew lyngba kine ki khynnah ba mynta jong kane ka skul kin sa long kita ki rishot na ka bynta ka Ri bad ka Jaitbynriew ki ban long kum kita ki MLA, MDC, ki nongialam shnong, ki nongialam Balang bad ki ophisar ha ki tnad sorkar bapher bapher. U ai mynsiem ruh kum ki khynnah skul ki dei ban don ka thong ha ka jingim ban leh ia kaba bha tam khnang ba ka lawei jong ki kan long kaba phyrnai, ong u tei u Myntri.
La pynphuh pynphieng ia kane ka sngi da ki jingrwai ba la shim bynta da ki khynnah skul bad ka jingwan sakhi lang ki nongshong shnong, katba ia ki kyntien ai khublei la ioh na u Secretary SMC ma W.B Pakma.
