Mynta ka sngi ka 24 tarik Kyllalyngkot 2025, ka Shnong Ranikor bad ki shnong ba marjan kiba hap ha ka South West Khasi Hills District, ka la ioh ban pdiang ia ka First Referral Unit (FRU) ha Ranikor Community Health Centre (CHC) na ka Sorkar Jylla hapoh ka jingialam jong u Myntri Rangbah Conrad K.Sangma.
Ha kane ka sngi ba plie paidbah ia ka FRU, la don ryngkat lang u MLA ka Ranikor Constituency Bah Pius Marwein, Bah Reniktok Lyngdoh Tonghar MLA ka Mawkyrwat, Kong Ampareen Lyngdoh, ki doktor, nurse jong kane ka CHC, ki paidbah na kane ka thaiñ kynthup na Nolikata, Balat, Mawlangwir, Umdohlun, Wahkaji, Rangblang bad kiwei kiwei.
Ka jingthmu jong ka Sorkar ban kyntiew na ka CHC sha FRU ka long ban pynbha ia ka jingshakri paidbah khamtam ia ki kynthei, kiba kha kyllung, ki jingjia aksisen bad kiwei na ka jingpyndonkam ia ki kor ba thymmai.
Ka Ranikor FRU kadei kaba 5 na ki CHC ba la pyntreikam ha ka wat ba nyngkong (1st phase), kynthup ia ka Mawphlang, Pynursla, Bhoirymbong bad Resubelpara. Kiwei pat ki ban hap ha ka wat ba ar ki long ka Namdong, Riangdo, Patharkhmah, Selsella, Phulbari bad Dalu.
Ha kane ka sngi, u MR u la shim ruh ia ka kabu ban iakynduh markhmat bad ki paidbah ka Ranikor Block kaba dei ruh shi bynta jong ka Mission CM Connect. U Myntri Rangbah u la pynpaw ruh ia ka jingkmen ban iohsngew na ki paidbah ia ki jingeh, ki jingiakynduh ba sngewsih.
Haba iakren bad jubab ia ki paidbah, u MR ong ba ka thong jong ka Sorkar lyngba ka CM Connect ka long ban wad ia ki lad ki lynti na ka bynta lait bad ban pynsuk ia ki paidbah. U la kren shai bad ban ruh bunsien ba ka Sorkar hi ka dei jong u Paidbah bad na ka bynta u Paidbah.
