U Myntri Rangbah ka Jylla, Conrad K. Sangma, hynne ka sngi ka 25 tarik Jylliew 2025 u la plie paidbah ia ka Meghalaya State Museum ia kaba la ai kyrteng da ka ‘William Sangma Musuem’ ha Soso Tham Auditorium Shillong.
Ha kane ka sngi la don ryngkat da u Myntri ba khmih ia ka Tnad jngohkai u Bah Paul Lyngdoh, Myntri ba khmih ia ka Tnad Bording u A. T. Mondal, ki ba haïing jong une u Nongialam ba khraw (Williamson) bad kiwei kiwei. Ia kane ka Musuem la ai da ka kyrteng jong utei u Myntri Rangbah ba Nyngkong ka Jylla na ka bynta ban kynmaw burom ia ki kam bad ki matti jong u tei u Nongialam. Ha kane ka sngi la pyllait ruh ia ka Shap (Logo) ba thymmai jong ka Tnad Arts and Culture.
Haba ai jingkren ha kane ka sngi, na ka liang u Myntri Rangbah u la pynpaw ia ka jingsngewsarong na ka bynta ka kolshor, ka jinglong tynrai ba ka jylla ka don. U la angnud ban kyntiew shuh shuh ia kine ki jinglong ba pher ba ka jylla ka don da kaba shim kabu ban bsut ha ka ioh ka kot bad ha kiwei ki bynta,“Kaei kaba la pynlong ba ngin pher na kiwei ki jaid bynriew ha ka pyrthei, kata ka dei ka jinglong ba kyrpang lane ka jinglong tynrai jong ngi, bad kane ka jinglong ba kyrpang la batai lyngba ka kolshor, ka ktien ka thylliej, ki jait riam ba ngi phong, ki jait jingdeng ba ngi pyndonkam, ka bam kadih, ka tem ka put bad kumta ter ter. Nalor ban pynneh ia kane ka jinglong ba tynrai, kumno pat ngin pynpher shuh shuh?”. ong u Myntri Rangbah.
Na ka liang u Bah Paul Lyngdoh u la ong ba kane kan long ka thup sah kynmaw ha ka khana pateng jong ka Jylla bad kane ka Museum ka dei ka ban pynkyrpang naka bynta ka jingkynmaw ia ki nongprat lynti lane ki nongiakhun na ka bynta ban ioh ia ka Jylla Rilum kaba pura, kum u Kapten Sangma.
