U Myntri Rangbah ka jylla, Conrad K. Sangma ha ka 16/01/2025 u la ioh ban plie paidbah ia ka Rural Health Centre (RHC) ba nyngkong eh ha Myriaw, kaba hap hapoh Mawthadrishan Constituency Eastern West Khasi Hills District.
Ha katei ka sngi la ioh ban don ryngkat da u MP ka Rajya Sabha, Dr. W.R. Kharlukhi ryngkat u MLA ka Mawthadrishan Bah Shakliar Warjri uba dei ruh Myntri ba khmih ia ka kam ïalehkai ha ka jylla, kynthup ruh ia ki Nongïalam Shnong.
U Myntri Rangbah uba la wan da lade ban plie pyrda ia kane ka jaka sumar u la ong ba ka jingkoit jingkhiah ka long kaba donkam bad haba phai ha ki bynta kum ki jaka sumar ka long kaba eh bad kaba shem shitom bha namar ka sorkar ka dang iakhun ban pynbha bad pynbun ia ki jaka sumar ha nongkyndong. U la ban ruh, kumba ka long mynta ki jaka sumar ki la pher shibun ban nujor na ki 7 snem mynshwa.
U la iathuh ruh ba ka Sorkar ka la kut jingmut ban pynkylla dur ha kaba iadei bad kane ka bynta bad la bhah 9% na ka bynta ka koit ka khiah kaba dei ruh ka bhah ba heh tam ha ka ri. 38.8 lak la dep ban mang na ka bynta kane ka RHC ha Myriaw lyngba ka CM Special Development Fund. Nalor kata u MR u la kular ruh ba yn sa pyllait shuh shuh shen sa 38 lak na ka bynta kane ka jaka sumar.
Ka Myriaw RHC kan lah ban peit kumba 21 tylli ki shnong ba marjan ia kaba la pyniaid da ka Dr. H.G Roberts Hospital Shillong. Ha kaba iadei bad ka jingsnohkti lang bad ka Roberts, u Conrad u la ong ba katba ka Sorkar ka dang pyndep ia ka kamram, ban ïatreilang bad kum kine ki Hospital ba heh kan long ka jingmyntoi, ka jingwanrah ia ka jingiatylli bad khamtam ban kyntiew ia ka jingsumar ba paka.
