Shi bynta ban khring shuh shuh ia ki nongjngohkai pyrthei na kylleng bad ban kyntiew ia ka ioh ka kot ha ka jylla, hynne ka sngi ka 4 tarik Nohprah, u Myntri Rangbah ka jylla Conrad K. Sangma u la plie paidbah ia u Mawnongrim na ka bynta ban sdang pyntrei noh ia ka Projek Shillong Ropeway kaba don ha u Lum Shyllong (Shillong Peak).
Kane kadei ruh ka Projek Tourism kaba heh tam ha ka jylla ba ka pyllait da ka Sorkar. Ka jinglut na ka bynta kane ka Projek ka kot haduh 175 klur tyngka.
Kum ban shu pynkynmaw, ia u Mawnongrim la wan ban duh da ka President jong ka ri, ka Droupadi Murmu ha u bnai Kyllalyngkot mynta u snem, bad hadien 11 bnai la ioh ban plie mynta ka sngi, ha kajuh ka por u Myntri Rangbah u ioh ban aiti ia ka cheque sha ka Riat Laban Dorbar Pyllun haduh 1.5 klur (1st installment) na ka bynta ban sdang noh shaid shaid ia kane ka Projek.
Ha kane ka sngi la ioh ban iadon ryngkat ruh u Bah Paul Lyngdoh, Myntri ba khmih ia ka tnad Tourism, Bah Sanbor Shullai MLA South Shillong, ki Nongïalam Shnong bad kiwei kiwei.
