U Nongbishar ba donburom jong ka Meghalaya High Court bad Executive Chairman ka Meghalaya State Legal Services Authority u Justice H.S. Thangkhiew mynta ka sngi ula plie paidbah ia ki ar tylli ki Legal Care bad ki Support Centres ha Jaintia Eastern College, Khliehriat bad ha St. Anthony’s Extension College Byndihati, ha ka jingiadon ryngkat u E. Kharumnuid ba dei u Registrar General, High court jong ka Meghalaya Cum Member Secretary ka Meghalaya State Legal Services Authority, u A.M. Ripnar ba dei u Registrat (Judicial Services), High Court ka Meghalaya, ka kong C. Dkhar ba dei ka District and Session Judge, East Jaintia Hills District cum Chairman District Legal Services Authority ryngbad u bah E. Kharmalki, IAS, Deputy Commissioner ka East Jaintia Hills District.
Kane ka long kum shi bynta na ka prokram jingrakhe ia ka “Azadi Ka Amrut Mahotsav” ha kaba la pynlong ia ka jingpynsngewthuh bad jingai jinghikai ia ki dkhot kiba dang pynrung thymmai jong ka Para Legal Volunteers (PLV) ha Anthony’s Extension College Hall, Byndihati, East Jaintia Hills District.
Ha ba ai jingkren u bah Thangkhiew u la ong ba ka Meghalaya State Legal Services Authority ka don ka thong ban pynioh ka jingiarap ba khlem kano kano ka jingsiew sha ki nongshong shnong kiba kyrduh ban kin ioh ia ka ka hok jong ki kumba ioh lem kiwei pat ki briew ki dap ba biang. U la ong ba Legal Service Establishment hapoh ka jylla kala trei shitom haduh katta ban pynioh ia ka jingbishar kaba mar ia ryngkat ia ki briew.
U bah Thangkhiew ula kren ruh halor ka skhim jong ka Para-Legal Volunteer (PLVs) da kaba ong ba ka skhim ka iarap ban pynioh jinghikai ia ki Volunteers kiba la jied na ki liang bapher bapher, khnang ba kin lah ban iarap ia ki briew kiba ia kynduh jingeh ha ki liang bapher bapher.
Kham hashwa la ioh ia ka jingkren na i kong C. Dkhar District and Session Judge, East Jaintia Hills iba la kren pdiang bad pynpaw ruh ba ka District Legal Services Authority, East Jaintia Hills District kala pyllong ia ki prokram bapher bapher ban pynsngewthuh sha ki paidbah ba wat la ki long ki bym kot bor ban ialeh ia kano kano ka mokutduma ruh hynrei na kane ka tnad ka kloi ban pynioh ia ka hok jong ki.
Ha kane ka prokram la iadon lang u S. Pdang Public Prosecutor, ka East Jaintia Hills, Dr. P. Nongtdu Pricipal ka Jaintia Eastern College, Khliehriat u Fr. George S. Lyngkhoi SDB Principal ka St. Anthony’s Extension College Byndihati, ki Panel Lawyers, ki Para-Legal Volunteers bad ki samla pule.
Kiwei de kiba ai jingkren ki kynthup ia ka N.Momin Chief Judicial Magistrate cum Secretary District Legal Services Authority bad ka kong B. Kharbithai, Judicial Magistrate First Class.
Ha kane ka sngi kala don ruh ka jonglehburom ia ki Panel Lawyers jong ka District da u bah Thangkhiew Nongbishar ka Meghalaya High Court bad la sam ruh ia ki prizes sha ki nongjop ha ka jingiakop thoh Essay bad jingthoh Slogan kaba la pyndep ha ka sngi burom ia ka sngi kha u Mahatma Gandhi (Gandhi Jayanti) ha ka 2.10.2021.
