La pyntrei kam mynta haduh 80 tylli ki Khanapur Thangbru ha kylleng ka jylla
U Symbud Myntri Rangbah ka sorkar jylla u ma Sniawbhalang Dhar mynta ka lah sngi U Blei ka 16 tarik u Jylliew, 2025 ula wan ban plie ïa ka dur mot sahnam (Bust) jong u nongseng bad u nongpynwandur ïaka ‘khnap thangbru’ thymmai (eco friendly crematorium) jong u (L) Kambel Shullai kaba don ha Dulong Pohhali, Jowai.
Kane ka jingplie ïa ka dur mor u (L) Kambel Shullai ka long shi bynta naka jingrakhe jong ka jingdap 13 snem ka jingkhlad jong u.
Na ka liang u President ka Seiñ Raij Jowai ma Hercules Toi ula pynsngew, ka jingdon jong kane ka khnap thangbru kala long ka jingmyntoi kaba khraw eh ïa ka jylla hi baroh kawei haka por ba pyndonkam ban pynkhuid noh ïaka met kaba la khlad ha jingngeit tynrai.
Shuh shuh ula ong kumba long mynta kine ki khnap thangbru kiba la shna ha ka rukom pynwandur u (L) Kambel Shullai, la pyntreikam mynta haduh 80 tylli ha kylleng ka jylla naduh ki thiañ jong ka Ri-Lum Jaiñtia, Khasi bad shaduh ka thaiñ Garo Hills bad ki dang don mynta kumba 40 tylli kiba dang apply ïa ka NOC ban shna ïa kum kine ki khnap thang briew.
La pynsngew mynshwa haka por ba thang briew la hap ban pyndonkam da kaba thang shibun tylli ki dieng, hynrei mynta kala pynduna bha wat ïa ka por ban thang briew kumba ar kynta, la ïathuh nyngkong duh hapoh kane ka khnap thangbru thymmai la thang ïa ka kong (L) Hilda Nartiang.
U kongsan ha kane ka sngi u ma Sniawbhalang Dhar haba ai jingkren ula ong kane ka sngi ka long ka jingsah kynmaw ïa u (L) Kambel, uba la pynpaw ba kane ka jingjop jong u ka long ka nongrim ban ‘im ka kyrteng sah ka nam’. Ula ai khublei ïa Seiñ Raij kaba la leh burom ïa une u riew rangbah da kaba pynsah nam lyngba une u dur mor ha ka jingdap 13 ka jingkhlad.
Shuh shuh ula ong ka jingdon kane ka khnap thangbru ka ïarap shibun eh naduh ka jingpynduna ïa ka por, ka Discipline, ban lait na ka jingpom pathar ïa ki khlaw bad kaba pynkhuid pynsuba ïa ka mei mariang ba itynnad. Ha ka juh ka por u kyntu ïa ki nongshong shnong ka Ri-Lum Jaiñtia ba kin don ka jingïatylli kawei, ka jingïaieit, ka jingkyrshan bad ka jingai myniem lem na ka bynta ka lawei jong ka jaitbynriew.
Kiwei de kiba la wan ban donlang ki kynthup naduh u symbud kongsan jong kane ka sngi u ma Wailadmiki Shylla uba long ruh u Chairman ka MUDA, u Ranjit Singh Gill uba dei ruh u Principal Chief Conservator of Forests and Head of Forest Force Meghalaya, kine ki rangbah ruh ki la pynpaw ka jingsngewnguh ïa u (L) Kambel uba don ïa kane ka sap ba kyrpang ban synñiang sha ka bri u hynñiew trep, kila pynsngew na ka liang ka sorkar kan bteng ban ai jingkyrshan pisa ban shna ïa kum kine ki khnap thangbru.
Ha kane ka sngi la donlang ki Dolloi jong ki Elaka, ki nongïalam ka seiñ raij, ki longkpa ki longkmie bad ki khun samla. La pynphuh shuh shuh ïa kane ka sngi da ki jingrwai na ka khynroo khyllood Committee ka seiñ raij Jowai.
