Ka Krishi Vigyan Kendra (KVK) Jaiñtia Hills, mynta ka sngi 12 tarik kala pynkut ïa ka prokram ‘Viksit Krishi Sankalp Abhiyan’ (VKSA) ha ki 9 tylli ki shnong hapoh ka Laskeiñ Block, Wapung Block bad ha Namdong Block, kane ka prokram ka long shi bynta ban leit ai jinghikai ïaki nongrep ka District.
Kine ki shnong hapoh Laskeiñ Block ki kynthup ïa ka Nongkynrih, Mookyndeng bad Mukhap. Ha Wapung Block ki kynthup ïaka Wapung Skur, Wapung Shnong bad Cham Cham. Katba ha Namdong Block ki kynthup ïa ka Namdong A, Sehlama bad Nongmulieh. Baroh ki nongrep kiba la wan ïashim bynta mynta ka sngi ki don haduh 1025 ngut, la sam ruh ïa ki symbai ba bunjait sha ki nongrep.
Na ka liang ki dkhot ka KVK kiba leit ban ai jinghikai sha ki nongrep la pynbynta ha ki lai tylli ki kynhun ha ryngkat ka jingdonlang ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ai jinghikai ïa ki nongrep naduh ka rukom rep ïa ki jait soh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
Ïa kane ka rukom ai jinghikai la bthah da u Myntri Rangbah duh ka Ri u Narendra Modi kum ka lad ban pynbha ïaka rep ka riang katkum ki lad jingtip kiba thymmai, na ka bynta ban pynlong ‘kawei ka ri, kawei ka kam rep bad kawei ka kynhun’.
La pynsngewthuh ruh ïa ki nongrep halor ka rukom pyndonkam ïa ki dawai (fertilizer) ban thung jingthung ha ki bynta ba bha jong ka khyndew bad ka jingpyndonkam ïa ki Drone haka rep ka riang. La ïathuh ba kane ka kam ka long shi bynta ban pynkiew ïa ka rep ka riang hapoh ka ri bad kane ka ïarap ïa ka lashai ban wan hadien ka 10-20 snem.
La batai ruh shaphang ki skim bapher bapher jong ki nongrep kiba lah ban ïoh na ka sorkar kmie kum ka PM-KISAN, NMEO, PMFBY, Soil Health card (SHCs), ka skim kaba ïadei bad jhur, ki soh, ka PMFME Scheme, SMAE scheme, ka Power tiller scheme, nalor kiwei de ki skim kiba lah ban ïoh jingïarap.
Ha baroh kane ka jingleit ai hikai kaba 14 sngi lynter kaba la sdang naduh ka 29 u Jymmang 2025, ka KVK Jaiñtia Hills kala ïoh lad ban poi sha ki 99 tylli ki shnong kiba hap hapoh Thadlaskeiñ, Amlarem, Laskeiñ, Namdong bad ka Wapung Block ha kaba baroh ki nongrep kiba wan ban ïashim bynta ki don haduh 9348 ngut.
