Mynta ka sngi ka 18 tarik Naitung ka Trophy jong ka Durand Cup ka la poi ha ka Nongbah Shillong ha kaba u Myntri Rangbah ka Jylla, u Conrad Sangma u la ioh ban don ryngkat ban pyni paidbah ia katei ka trophy ha ka jingsynran jong u Myntri ba khmih ia ka Kam Ialehkai, u Bah Shakliar Warjri, Air Marshal, EAC, S P Dharkar, Lt Gen Sanjay Malik, GOC, 101 Area, GOC, Bengal sub-area, Vice Chairman DC-OC, Maj Gen Rajesh A Moghe, ADG NCC, Maj Gen Gagan Deep & Additional Chief Secretary, Government of Meghalaya, Dr Shakil Ahammed bad kiwei kiwei.
Ha ka jingkren jong u Myntri Rangbah, u la ong ba ka jylla ka la angnud ban ioh pdiang (host) ia kane ka lympung kaba heh ha une u snem ba lah dep hynrei na ki katto katne ki daw la rai ban pdiang noh mynta u snem “Nga kmen shikatdei bad ka long ruh ka kabu ba ka Meghalaya ka la ioh ban don bynta ha kane ka lympung ba la rim tam ha India bad ha Asia kaba dei ruh ka lympung ka ri kaba don ha ka kyrdan ba 5 ha ka pyrthei. U la ong ruh ba ka sorkar kan ai ia ka jingkyrshan ba pura bad ban pyntikna ba kane ka lympung kan long kaba seisoh.
U la ban biang da kaba ong ba ka Jingialehkai kadei kawei na ki mat pdeng jong ka Sorkar bad ki la iai buddien ruh kumno ban kyntiew ia ka kam ialehkai ha ka jylla da kaba iai kyrshan bad iai ai mynsiem ia ki khun samla. “Ha kine ki 6 snem ba lah dep, ngi la aiti kumba 1000 klur na ka bynta ban kyntiew ia ka kam ialehkai bad ban shna ia ki jaka ialehkai. Bad ki jingkyrshan ki kynthup ha ki jait jingialehkai bapher bapher, kynthup ruh ia ki seng/kynhun kiba khmih bad kyntiew ia ki kam ialehkai”. Ban pynkut ia ka jingkren u Myntri Rangbah u la kyrpad ia ki paidbah ba ki don bynta, ban kyrshan bad burom ia kane ka lympung Durand Cup 2024.
Ki kynhun ki ban don ha kane ka aiom ki kynthup ïa ka Bengaluru FC, Mumbai City FC, Mohun Bagan Super Giant, East Bengal FC, Kerala Blasters FC, Jamshedpur FC, Odisha FC, NorthEast United FC, Hyderabad FC, Chennaiyin FC, Roundglass Punjab FC, FC Goa, Gokulam Kerala FC, Mohammedan SC, Rajasthan United, Shillong Lajong FC, Delhi FC, Bodoland FC, Indian Army football team, Indian Air Force football team, Indian Navy football team, Bangladesh Services, Bhutan Services, bad Nepal Services.
Ïa kane ka lympung la sdang ha u snem 1888 ha kaba ka Durand Football Tournament Society (DFTS) bad ka All India Football Federation (AIFF) ki dei ki seng kiba la pynïaid ïa kane ka lympung naduh katei ka snem ba la sdang nyngkong ha Shimla.
Baroh ki kynhun kiba don ha ka Indian Super League bad haka I-League ki ïoh ban ïashim bynta ha kane ka lympung kaba la pynlong shisien ha ka shisnem. Kumta kan long ka ka kabu na ka bynta ki rangïalehkai na kane ka jylla ba kin ïoh ban ïakhun pyrshah ïa ki klob kiba heh ha India kynthup ïa ka Bengaluru kaba don ïa Sunil Chhetri bad ka Mumbai City kaba dei ka lahduh jong ka lympung ISL. Kan long ruh ka kabu na ka bynta ki samla ïalehkai phutbol kiba na kane ka jylla ba kin ïoh ban ïakynduh ha ka sien ba nyngkong na ki klob bapher bapher khamtam ïa ki rangïalehkai ka Lajong ba kin sa ïakhun pyrshah ïa ka North East United FC kaba don mynta ïa u Redeem Tlang, ïa ka FC Goa kaba don ïa u Aiban Dohling bad ïa ki khlur ïalehkai na shabar ri.