I Deputy Commissioner jong ka East Khasi Hills District i kong R.M. Kurbah, IAS, mynta ka sngi 11.12.23 ila pyllait paidbah ia ki kali kiba kit ia ki Electronic Voting Machine (EVM) na ka bynta ban pyni bad ban ioh pyrshang sha ki paidbah kum shi bynta ban pynkhreh ia ka jingjied nongmihkhmat sha ka ïing dorbar thawaiñ ka ri India ka Lok Sabha.
I kong Kurbah haba ai jingkren ha shwa ban pyllait ia kine ki kali, kala ong ba ka long kaba donkam bad ka kamram jong ki paidbah kum ki nongshong shnong ba don ka jingkitkhlieh ban poi sha ka jingjied ia ki nongmihkhmat sha ka Lok Sabha ka ban sa long shen ha u snem ban wan 2024. Ka khmih lynti ba ki 6 lak tam ki nongshong shnong jong ka District kiba la don vote bad kin wan shitrhem da ka mynsiem kaba sngewkhia ban pyndep ia ka hok jong ki. Kala pynkynmaw ha kane ka jingjied MLA ba dang shu dep shen ka jingpoi ki vote hapoh ka East Khasi Hills District ka poi sha ka 80% tam, kumta ka khim lynti bad kyntu ia ki paidbah ba ha kane ka elekshon MP ruh ki dei ban mih bha ban kynjoh sha ka thong.
I kong Kurbah ila pyllait ia ki kali ba la tip kum ki Demonstation Van, kiba don lang ia ki EVM bad kine ki kali kin iaid sha kylleng ki shnong ki thaw ban ai ka jingpynsngewthuh halor kumno ban pyndonkam ia ka EVM. I kong Kurbah ila pynshai ba kine ki machine kiba la rah sha ki paidbah kim ym dei satia ki ban pyndonkam ha ka sngi thep vote hynrei kin dei tang ki machine ban ai jinghikai ia ki paidbah ban kin tip bad skhem jingmut ban pyndonkam ia ki ha ka por ba pynlong ia ka jingthep vote.
Kane ka jingpyllait kaba mynta ka dang long tang ka wat (Phase) kaba nyngkong bad yn sa leh pat sa ka Phase kaba ar khnang ba kito ki samla kiba la kot sha ka rta kaba 18 ki ban sa pyndonkam nyngkong ia kane ka machine kin ioh bynta bad sngewthikna ne sngewshlur haba ki ktah ia ka EVM.
