Arngut ki long kmie kiba na ka shnong Darrang ki la ioh ban pyllait im ia kawei ka jait dkhoh kaba tip kum ka Brown wood Owl kaba ka jingheh ka dong kumba 45 centimeter. Kine ki longkmie kiba leit thoh dieng man ka por sha khlaw sha bri, ki la lap ia kane ka sim kaba heh ba ka dem ha khyndew i kumba ka don jingshitom. Ki la shim ia kane ka sim bad pyllait im ia ka khnang ban lait na ka jingshah pyniap na kiwei ki mrad lane na ki briew.
Kumta ki la rah shapoh shnong bad ki la pyntip mar mar sha u Secretary ka Darrang Tourism Development Society u samla Songkiman Ryngksai bad ruh sha ki nongialam shnong ban sumar ia kane ka sim ban lait na ka jingiap bad u ne u samla u lah phone sha ka tnad Wildlife West Jaintia Hills ban wan shimti ia kane ka sim ba kin sumar bad ban ym duh jait namar kadei kawei na ki sim kiba lah jan duh jait. Kumta na liang ka tnat Wildlife ki la hiar sha shnong Darrang ban leit shimti ia kane ka sim bad ban ai jingsumar ia ka.
Na ka liang ka shnong ka la kyrpad ia ka sorkar badei ban ai khusnam ia kine ki ar ngut ki longkmie kiba wan na ka longïing baduk ba dei ban ai da ki kynja scheme iaki ne ki long kmie kiba la pyllait im ia kane ka sim ym tang ban ai ki memento lane certificate namar lada ai daka song pisa jingiarap lane kynja scheme kan nang ai mynsiem ia ki bad ia kiwei ban shimkhia ban nang pyllait im ia kum kine ki jait jingthaw kiba la jan duh jait bad kin lait na ka jingshah pyniap pathar ha ki runar ki bym don ka jingkit khlieh ia ka mrad kiba la jan duh jait na ka sla pyrthei.
