Ka United Democratic Party ha ka 5 tarik Kyllalyngkot 2025 ka la pyllait paidbah ia ki mat treikam na ka bynta ka Elekshon MDC sha KHADC bad JHADC 2025 ha Ophis treikam jong ka Seng ha Boyce Road Laitumkhrah Shillong.
Ha kane ka sngi ba pyllait paidbah ia ki mat treikam la iadon lang da u Bah Paul Lyngdoh , Jemino Mawthoh, Titos W Chyne, ki Kyrtong jong ka UDP bad ki Nongkitkam jong ka Seng UDP.
Haba kren sha ki lad pathai khubor na ka liang u Bah Titos W Chyne u Working President jong ka UDP u la ong ki mat treikam kiba ka UDP ka la pyllait paidbah mynta ka sngi ki kynthup ia ka jingpynkup bor ia ki District Council, ka UDP kan kynthup ban ai bor shuh shuh sha ki District Council da kaba kynthup ia ki mat kum ka hok halor ki jaka ki pura, ki marpoh khyndew, ka buit bad jingstad tynrai, ka Rukom sumar trai ri, ki rukom ialehkai tynrai bad kiwei kiwei ha ka Paragraph 3 jong ka khyrnit kaba Hynriew ka Riti Synshar ka Ri India.
Ban pynkylla ia ka Para 12 A ka ban kdew shai ba ki aiñ jong ka Sorkar pdeng bad sorkar Jylla ha kaba ïadei bad ka riti dustur, ki rukom ioh ban ai pateng , ka rukom mane bad duwai phirat, ka khyndew ka shyiap, ki khlaw ki btap bad kumta ter ter.
Ban wanrah ia ki kyndon aiñ kiba thymmai kiba dawa na u lat ba u dei ban mynjur ia ki Bill ki District Council kumba leh ki Bill jong ka Jylla katkum ka Article 200 ka Constitution jong ka Ri India.
Ka UDP ka Pyrshah ruh ia ka jingthmu ban thung MDC shu sieh da ki riewlum ki bym dei ki trai muluk ha ki District Council bad kiwei ki kyndon kiba buh jingma ia ki Dorbar Trai Ri.
U Pud U sam ka Jylla
Kum shi bynta ban iada ia ki thaiñ khappud bad ka Bangladesh .
Ka jingkyntiew ia ki Riewlum Trai Ri, Ka UDP kan shimkhia ban iada bad ka pynpaw ba la donkam kyrkieh ban pynbeit thymmai ia ka thup jong ki Schedule Tribes ha ka Jylla.
Ka jingpyrshah halor ka jingshah thombor ki riti dustur, Ka UDP kan pyrshah ia ka Uniform Civil Code bad ia ki wei ki ain kiba ktah ia ki riti ki dustur.
Ka Synshar khadar kaba khuid, Ka UDP kan shimkhia ban tehlakam ia ki khyrdop khrong khajna beaiñ ha ki surok bah kiba hap ha u pud u sam jong ka Khadc bad JHADC, bad kan wanrah ia ka jingthungkam kaba khuid bad ka bym leh shiliang khmat ha ki District Council.
Ka jingkyntiew ia ka ktien ha ka Jylla, ka UDP kan shimkhia ban buddien halor ka jingdawa ban pynrung ia ka ktien khasi bad Garo ha ka khyrnit kaba phra jong ka Riti Synshar ka Ri India.
Ka hok halor ka khyndew ka shyiap bad ki mar poh khyndew , ka UDP kan shimkhia ban wanrah ia ki ain khyndew kaba long kat kum ka riti bad khyndew ha JHADC bad ban pyntreikam pura ia ka bad kumjuh ia ki aiñ kiba na UDP ka la wanrah ha ka por ba UDP ka ialama ha ka EC bad kan iai buddien ban pyntreikam pura noh ia ka (Regulation and administration of land) Act 2021.
Ka jingiada Mariang bad ka khuid ka suba, Ka UDP kan pyrshah halor ka jingpyrshang ban khlong ia ka mar poh khyndew Uranium ha ka Jylla Meghalaya.
Ka jingteh lakam ia ka jingrung kyrthep ki Poiwir Barri bad Bar Jylla, Ka UDP kan wad ki lad bad ki kynti ban pynkup bor da ka ain ia ki Hima/ Elaka , Ki Raid bad ki Shnong ba kin tehlakam ia ka jingwan buhai shnong ki Poiwir bar Jylla bad barri ba kim lah ban shong shnong nw wan trei khlem ka jingbit jong ka Dorbar Shnong .
Ka khaiï ka pateng bad ki iew ki hat , ka UDP kan pyrkhing ia ka Jingai trading license sha ki nongkhaii mynder bad ban buh noh ia u pud halor ka jingdon jong ki Nongkhaii Non Tribal ha ki iew ki hat.
Ka jingpynkhlaiñ ia ka pla tyngka jong ka konsil, ka UDP kan shimkhia ban iakren bad ka sorkar india ban ioh noh ia ka mang tyngka ia ki shnong katkum ka artikil kaba 280, ban kyntiew ia ka mang tyngka katkum ka artikil kaba 275 jong ka Riti Synshar Ka Ri India.
Ka jingburom ia ki briew ba duna dkhot met, kum ka jingburom ia ki briew ba duna dkhot met yn bhah kam 3 percent na ka bynta jong ki hapoh ka District Council.
