Ka Hills State People Democratic Party (HSPDP) ha ka 08 tarik Kyllalyngkot 2025 ka la pynbna ia ka thup kyrteng kaba ar jong ki kyrtong ki ban iakhun ia ka Elekshon KHADC ka ban sa long shen ha ka 21 tarik Rymphang 2025.
Haba kren sha ki lad pathai khubor na ka liang U Bah KP Pangngiang u la pyntip ba ka Hills State People Democratic Party ka la pynbna ia ka kyrteng jong ki 3 ngut ki kyrtong ha ka thup kaba ar ba kynthup ia u Bah Starfing Pdahkasiej na Mawsynram , Kong Phinda Warjri na Pariong , bad Srally Rashir na Mawshynrut.
Na ka liang u Bah KP Pangngiang u la ong ha ka thup kaba ar ki don 3 ngut ki kyrteng jong ki kyrtong ba ka HSPDP ka la dep pynbna bad u la ong ka don ruh ka bynta kaba lai bad ka don ruh kawei kaba sngewsih ba u sitting MDC Bah Martle Mukhim u don hapdeng ka jingshitom bad hynne ka sngi ka 8 tarik Kyllalyngkot ngim ioh ban pynkut bad ha kine ki sngi ngin sa ioh ia ka thup kyrteng kaba- lai bad ka list kaba khatduh jong ka HSPDP.
Shuh shuh u la bynrap “Ka HSPDP ka dei ka party kaba rim tam ha ka Jylla naduh ka snem 1968 ,ki issue,ki riti treikam ka la don lypa ha Constitution jong ka party bad ki dei ki juh hi kiba ma ngi kum ka party ngi ïeng, ban pynkhlain shuh shuh ia ka bor jong ka District Council hapoh ka Sixth Schedule haba iadei bad lai tylli ki phang pyrkhat jong ka party kaba ngi ju don ,ban pyneh pynsah ia ki hok ki mati ki longshwa ban iada ia ka hok jong ngi ka khyndew ka shyiap ne ia u pud u sam, bad kaba lai ka long ban pynbha ia ka synshar khadar naduh ka synshar shnong , ka synshar Hima lane ia ka District Council bad kine ki dei ki 3 tylli ki mat kiba ka party ka Ïeng .
Shwa ban pynkut u la ong,” ngi ai ka jingkitbok ia kine ki 3 ngut ki kyrtong kiba ngi la pynbna mynta ka sngi bad watla ngim shim lah ban pynïeng kyrtong ha baroh ki constituency hynrei ngi la jied kiba kynsai tam bad kaei kaba ka party ka jied ngi don jingkyrmen ban poi sha ka thong kata ka dei ka jingpyrshang jong ka party” pynkut u Bah KP Pangngiang.