Ka kynhun rwai jong ki Pulit kaba la tip kum ka Meghalaya Police Cultural Troupe kala pyllait paidbah sa ia kawei ka video album kaba la ai kyrteng ka “Only One Earth” kaba dei shi bynta na ka phang jong ka jingrakhe ia ka jingpynneh pynsah mariang.
Ha ka jingpyllait khubor jong u bah Lakador Syiem, MPS ula pynpaw ka jingsngewnguh ia ki nongrwai jong kane ka kynhun jong ki Pulit kiba la shim ia kiwei pat ki kam nalor ka kamram kaba ki hap ban pyndep man ka sngi kum ki Pulit. Kane ka dei kawei pat ka video kaba la bteng na “Beyond The Call Of Duty” bad kane ka video “Only One Earth” ka long shi bynta ban ai ka jingpynsngewthuh sha ki paidbah halor kumno ban pynneh pynsah ia ka mei Mariang.
U bah Syiem ula ai khublei ruh ia u Director General of Police, ki heh Pulit bad baroh ki para Pulit kiba la pyndep ia la ki kamram la 50 snem naduh ba la ioh ia ka jylla ba pura ha ka ban pynneh pynsah ia ka mei mariang.
Ula ai khublei kyrpang ia i kong I. Nongrang, IPS Spl. Director General of Police kaba la pynshlur bad kyrshan ia kane ka kynhun ha kiba bun ki liang bad kaba la pynlong ia kane ka jingthmu kaba jop.
U bah Syiem ula ong ruh ba naduh 50 snem mynshwa ka phang jong ka jingrakhe ia kane ka sngi pynneh pynsah mariang ka dang neh ka juh bad kata ka long “Only One Earth” bad u ong kane ka long kaba shisha namar dei tang kane hi ka pyrthei kaba dei ka ïing jong ngi.
Ula ong ruh ba kum shi bynta na ka jingrakhe ia ka jingdap 50 snem ka jingioh jylla ba pura kala dei ban wanrah ia ka pyrthei kaba jyrngam bad kaba khuid na ka bynta ki khun ki ksiew ha ki pateng ban wan, da kaba ula ban ruh ia ki kyntien kiba ong “Ba ngim shym la ioh pateng ia ka pyrthei na ki longshwa jong ngi, hynrei ngi shim kylliang ia ka na ki khun jong ngi”.
Ia kane ka video album la pynmih da ka West Jaintia Hills District Executive Force bad ka 6th Battalion, Meghalaya Police, Umran.