Mynta ka janmiet jong ka 4 tarik, u ma Arbor Hima Darnei uba dei u MDC jong ka Saipung Constituency ula wan ban pyllait paidbah ia ki tiket Lucky Draw jong ka Dorbar Shnong Mookyrdup, ha ka jingialang kaba la pynlong ha Dorbar Hall jong ka shnong.
Ha shwa ban pyllait paidbah ia kine ki Tiket la don ka jingialang kaba lyngkot, ha kaba ia ka jingialang la pyniaid da u Waheh Shnong ma Pyrkhat Shylla, ha ka jingiadonlang u Secretary Shnong ma A. Khonglah, u Fete Secretary ma L. Shulet, ki dkhot ka Executive Body ka shnong ryngkat bad ki paid nongshong shnong.
U ma Darnei haba kren lyngkot u kyrmen ba kane ka jingpynkhalai ia ki Tiket Lucky draw kaba dei shi bynta na ka Mini Fete jong ka shnong kan long kum ka jingiarap ban kyrshan ia ki jingdonkam jong ka shnong, khamtam ha ki jingthmu ban pynbha shuh shuh ia ka Dorbar Hall jong ka shnong. U khmih lynti ba kine ki Tiket kin long kiba iaid iew bad kiba lah ban pynioh jingmyntoi ia ka shnong. U khot lang ia baroh ki nongshong shnong ban long kiba iatylli ban pynlong ia kane ka jingthmu jong ka shnong kaba jop.
La ioh ruh ka jingkrenpdiang sngewbha na u Secretary Shnong ma A. Khonglah.
Ia kine ki Tiket Lucky Draw yn sa pynkhalai ha ka 5 tarik u April 2024 ha ka Mini Fete jong ka shnong ka ban sa pynlong ha phyllaw jong ka Dorbar Hall.
Ka dor jong ki Tiket ka long Rs.10/- kawei (Shi sla) bad Rs.100/- tyngka shi Book. Na ka liang ki nongpyniaid jong ka Fete ki kyntu ia ki paidbah nongshong shnong najan bad na jngai ba kin sngewbha ban iathied lem ia kine ki Tiket khnang ba ka jingthmu jong ka Shnong kin long kiba jop.
