Synniang T.3 Lak na ka MLA Skhim sha ka jingtei ia ka Dorbar Hall
Mynta ka ka janmiet u ma Wailadmiki Shylla MLA ka 2-Jowai Constituency ula ioh ban wan pyllait paidbah ia ki Tiket Lucky Draw (Fete) jong ka Dorbar Shnong Mookyrdup kaba la buh ban pynlong ha 11 tarik u Naiwieng 2022.
Ha kane ka jingwan pyllait ia kine ki tiket na ka liang jong u ma Wailad u la ioh lad ruh ban iathuh ia ki skhim pynroi kiba ula dep ban pynkhreh na ka bynta ka shnong Mookyrdup kiba iadei bad ka jingpynbha ia ki ar tylli ki surok heh kiba don hapoh ka shnong da kaba pyntrei lyngba ka skhim Jowai Smart Town kaba kynthup hapoh ka 33 Kms ha baroh ka nongbah Jowai, bad ia kane yn sa pyntrei ha kine ki bnai ban wan ula ong.
Nalor kiwei de ki jingiarap ba kynthup ia ki Nala shnong bad ruh ka jingpynbha ia ka Dorbar Hall jong ka shnong kaba ula synniang T.3,00,000/- (Lai Lak) tyngka na ka MLA Skhim jong u. Ia ka Work Order na ka bynta ka jingpynbha ia ka Dorbar Hall la aiti mynta hi ka janmiet ha u Waheh Shnong ma Pyrkhat Shylla.
U ma Wailad ula kitbok kitrwiang ba kine ki Tiket kin iaid iew bad kyntu ia ki paralok parajor najan bad na jngai kin iathied ia ki, khnang ba kan long ka jingmyntoi ia ka shnong ka thaw. Ha kaba iadei bad kane u ma Wailad ula noh synniang ruh T.5,000/- (San Hajar) tyngka. U la kitbot kit rwiang ruh ia baroh ki nongialam shnong ba kin lah ban pyniaid beit pyniaid ryntih ia kane ka Fete Shnong.
Ia ka jingialang la pyniaid da u ma Pyrkhat Shylla, Waheh Shnong Mookyrdup.
La ioh ia ka jingpynkup Ryndia Tlem ia u Kongsan (Wailadmiki Shylla) da u ma M.M. Thaiang u riew rangbah jong ka shnong bad u dkhot ka Executive Body. Ka jingduwai na u ma W.R. Shylla, ka jingkren lyngkot na ka kong E. Shylla bad na u ma A. Khonglah General Secretary ka DS Mookyrdup.
