Ka kot kaba la ai kyrteng “Ka kot hikai tem ksing bad duitara” (ka kot shaphang ki ar tem jong ki tyngshop bad ka duitara) ba la thoh da u Mebanlamphang Lyngdoh la pyllait paidbah da u Bah Paul Lyngdoh Myntri ka tnad Arts & Culture jong ka sorkar Meghalaya mynta ka sngi Saitjain ka 5 tarik Risaw 2024.
Ha kane ka sngi pyllait paidbah ia ka kot la don ryngkat da i kong Silbi Passah iba la ioh ia ka khusnam Padmashree Award, U Mebanlamphang Lyngdoh u nongthoh ia kane ka kot u bah Paul Lyngdoh Myntri ka tnad riti dustur bad kiwei kiwei ki nongshah khot sngewbha.
Haba kren ha kane ka sngi, u Myntri u la ong ba ka put ka tem ka don ha man la ki bynta jong ka Ri Khasi bad Jaintia. U la ong ba ngi long kiba la kyrkhu, ba ka imlang sahlang ka la roi ha kine ki snem bad ba la ithuh ia ki nongrwai na ka jylla. Haba ai mynsiem ia u nongthoh, u la ong ba ym don ka jingkut kaba pura ia ki nongdro dur kiba thaw jingthaw bad ki nongpud nongtem. U la pynpaw ka jingkyrmen ba ka jingrwai naduh ka Ri Khasi Jaintia kan pawnam sha kylleng ka pyrthei.
U Mebanlamphang Lyngdoh ha ka jingkren jong u, u la ong ba ka jingpynkhreh ban pyllait ia kane ka kot ka la sahteng la slem bha. U la pyntip ba ia kane ka kot la phiah ha ki 4 tylli ki lynnong kum ka jingpyniabynta kaba jylliew ia ki tiar tem, kane ka kot ka buh ruh ia ka jingkdew ia ki kyntien tem Khasi bad kiwei kiwei ki lynnong ki ban long kiba sngewtynnad ia ki nongtem.
U la pynkynmaw ba dei ha ka por jong ka jingkhang dam ba u la ïaid kylleng ka ri Khasi bad Jaiñtia ban sngewthuh ïa ki tiar tem bad ban ïakynduh bad ki nongtem ruh kumjuh.
Ha ka jingkren jong ka kong Silbi Passah, Padmashree ka la ong ba kane ka kot kan long ka jingmyntoi ïa kito kiba shna ïa ki tiar tem, ki nongtem bad ki samla pule.