-Angnud ban pynkylla dur ïa ka synshar khadar ha u 2028-
U Bah Ardent Miller Basaiawmoit, MLA Nongkrem Constituency uba dei ruh u nongialam ba rangbah ka Voice of the People’s Party (VPP) hynne ka sngi ka 12 tarik Jymmang 2025 u la lum ia ki paidbah jong ka konstitwensi na ka bynta ban pynbna paidbah ia ka bhah lane ka mang tyngka (MLA Scheme) kaba la wan lyngba ka Special Rural Works Program (SRWP) na ka bynta u snem 2024-25 kaba kot 2 klur shiteng.
U Bah Ardent u la pynshai ba ia katei ka skhim ka Sorkar Jylla ka la bhah lyngba ka SRWP bad kum u MLA u la phiah ia kitei ki skhim na ka bynta ki jingmyntoi jong ki paidbah ha ki liang bapher bapher. Kitei ki skhim ia kiba u MLA u la phiah kyrpang ki long – ban shna ia 40 tylli ki ïing ba duk hapoh ka konstitwensi, ka jingmaramot bad pynkha kamra 180 tylli ki ïing, ban iarap na ka bynta ki nongrep, ki nongkhaïi lane kino kino ki kam barit jong ki briew kiba hapoh ka konstitwensi – 500 ïing, ka jingtei ia ka Smit College 25 lak, ka jingpynkha kamra na ka bynta ka skul Hajong Memorial L.P. School Smit – 10 lak, ka jingker sawdong (fencing) ia ka jaka thang briew jong ka Seng Khasi Smit – 5 lak, ka jingshna ia ka Community Hall Laitkor 15 lak, ka jingtei ia ka Martial Arts Training Centre, Laitkor – 10 lak, ka jingpynheh ia ka St. Peter Madanrting Secondary School – 15 lak bad 15 lak sha ka Mawpathih Secondary School 15 lak.
Ha katei ka jingialang u Bah Basaiawmoit u la shim ruh ia ka kabu ban ai khublei ia ki paidbah kiba la bteng ban iai ai ia ka jingkyrshan na ka bynta ka party. U la pynkynmaw ruh ia ki paidbah ba kin pynpoi kham kloi ia ki kyrteng jong ki na ka bynta ban ioh ia kitei ki skhim namar lada pynslem ka shem jingeh ia u namar ka jingkhia kam. Ha kaba iadei bad kane ka mat, u Bah Ardent u la ong ka jingbunkam jong u kam dei namar tang na ka bynta ka konstitwensi lajong hynrei namar u angnud ban pynkylla dur ia ka synshar khadar ha ka jylla bad u la pyntikna ruh ba ka seng kam pat sangeh haduh mynta ban iakhun na ka bynta ka sain dur thymmai bad kane kan lah ban urlong ha ka elekshon 2028. Shuh shuh u la ong ba naduh ka khyllipmat ba u rung sha ka sain hima, ka thong hi ka dei ban trei na ka bynta ka jaidbynriew ym tang na ka bynta ka konstitwensi ba u la jop “ “lada ngi kwah ia ka bor synshar ha u 2028, nga hap ban ai ruh ka por shabar ka konstitwensi. Nga mih na ka bynta ka Ri bad ka jaitbynriew namar ngam kwah ban shakri tang ia ka konstiwensi lajong” ong u Bah Ardent.
Nalor kata, u la pynpaw ruh ka jingkmen ia ki paidbah kiba la kyrshan ia ka party naduh kaba sdang bad kyrpad ruh ban iai bteng ban kyrshan na ka bynta ban wanrah ia ka jingkylla “ngi long ka party kaba dang lung hynrei kaba la leh shibun ki kam kiba radbah ha kaba tang 3 snem ngi dang iaid, ngi la don u MP uba mih khmat na ka jylla sha Parliament, ngi la synshar marwei ha KHADC, ngi don ruh ia u MDC kum u nongialam ka liang pyrshah ha JHADC, watla katta, ngi dang donkam shuh shuh ban pynkhlain” ong u Bah Ardent.