Mynta ka sngi u Chief Minister ka jylla u Conrad K Sangma ryngkat bad ka kynhun ki Minister jong u, u la pyllait paidbah ia ka kot lyngkdop kaba ai kyrteng “Meghalaya on the move” kaba dei ka ripot treikam jong ka sorkar Meghalaya Democratic Alliance (MDA) ha kine ki saw snem.
Haba kren ha ka jingialang u Conrad Sangma ula ong ba hapoh kine ki saw snem ka sorkar kala ai ka mon laitluid ia ki tnat sorkar bapher bapher ba kin trei hala ka jong ka jingshimrai jong ki, na ka bynta ka jingmyntoi ki nongshong shnong ka jylla. U ong ruh ba bun ki jingeh jong ka jylla lah ban pynduh dei tang da ka jingiatreilang jong ki paidbah.
“Ngi don hangne ym ban ialeh sngewbha, hynrei ngi la leh shibun ki kam kat kiba ngi lah ei na ka bynta ka jingmyntoi jong ki nongshong shnong ka jylla. Ngi buh ia ki nongshong shnong ka jylla ha khmat duh” la ong u shuh shuh u Chief Minister.
U CM ula pynkynmaw ba ha ki por ba mynshwa ka jingpyntrei ia ka PMGSY ka long kaba duna haduh katta katta, hynrei hapoh kine ki saw snem ka sorkar kala lah ban pynstep haduh katta ia ka skhim kaba la pynlong ia ka jylla kawei na kiba nyngkong hapoh ka ri India ban pyntreikam hok ia kane ka skhim.
Shuh shuh ula pyntip bad ha u snem 2018-2022 la lah ban shna haduh 1851 km ki surok ha ki nongkyndong ha ka jinglut kaba T.1300 klur tyngka, haba shim jingkhein ha u snem 2020-2021 ka jingshna surok hapoh ka jylla ka long 2 km ha ka shi sngi.
Ula ong ba ka jingpynlut jong ka sorkar ka long T.10,000 klur ha ka shisnem kaba yn sa kyntiew sha ka T.15,500 klur ha une u snem. Katba ka jingpynlut ka dang bun katta ka jingroi jong ka jylla ki nangkiew, wat la ka sorkar ka ia kynduh shibun ki jingeh ha kaba iadei bad ka jingwan lynshop jong ka khlam Covid-19.
U Conrad u ong ba ka sorkar kala wanrah shibun ki jingpyniohkam ha ki thain nongkyndong, ka jingkyntiew ia ki longkmie, nalor ka jingpyrshang ban pynbiang ia ka umbam umdih bad ka bor ding elektrik sha man la ki thliew ïing. Ka sorkar ka pynmih ia ki prokram na ka bynta ka jingmyntoi jogn ki nongrep, kumjuh ha ki kam sumar bad ka jingpynbha ia ka pule puthi.
Khadduh eh u Chief Minister u la ong ba ka sorkar kala shim ia ka jingkular ban pynlong ia ka Meghalaya kawei na ki 10 tylli ki jylla ba wan shakhmat hapoh ka ri India hapoh kine ki 10 snem.
Ha kane ka juh ka sngi la pyllait ia ka Meghalaya 1st Early Childhood Development & Maternal Health Helpline ‘14410’ ka ban ai jingiarap ba kyrkieh ia ki longkmie bad ki khunlung. Kumjuh ia ka Chief Minister’s Safe Motherhood Scheme ha ka jingiadonlang u Helath Minister u James K Sangma. U la pyllait ruh ia ka ASHA Payment Gateway. Ha ka juh ka por u CM ha ryngkat u Minister ka Urban u bah Hamletson Dohling ula pyllait ia ka prokram “Aspire – 2 and Skills Meghalaya Programme” kaba dei ka prokram ban kyntiew ia ki samla na ka bynta ka lawei.
