Ka Meghalaya Pradesh Congress Committee (MPCC) ha ka 1 tarik u Nohprah 2025 ka la pynbna paidbah ïa ka National Talent Hunt Programme, kaba dei kawei na ki lad ban plie lad plie lynti ia ki Samla ha baroh kawei ka India hapoh ka jingialam jong ka All India Congress Committee (AICC).
Ha kane ka sngi ba pynbna paidbah ia ka National Talent Hunt la iadonlang naduh u President ka MPCC u Bah Vincent H Pala, Working President, ka Deborah C. Marak ki nongïalam ka AICC na Delhi bad ka State Zonal Coordinator ka Meghalaya, Kong Onika.
U Matthew M Anthony, Joint Secretary AICC, haba kren sha ki lad pathai khubor u ong ka “National Talent Hunt” ka dei ka jingpyrshang jong ka party ban khot ïa ki samla pule, ki stad wad bniah bad ki briew ba la nang la stad ba ieit ïa ka synshar paidbah bad ïa ka riti dustur jong ka ri India. U la ong ba ka Meghalaya ka long ka jylla kaba bun ki riew donsap bad ki samla kiba stad, kunta ka Congress ka kwah ban ai ka lad kaba kyrpang sha ki ban wan shim bynta ha ka rynsan India baroh kawei.
U la pynkynmaw ruh ba ka Congress ka dei ka party kaba la ai Jylla (statehood) ïa ka Meghalaya bad la tei ïa bun ki bynta ha ka jylla naduh ba dang sdang.
Ka State Coordinator, haba ai jingbatai shaphang ka National Talent Hunt ka la ong, ka jingpynrung kyrteng lyngba ka Google Form kan sdang naduh 1 tarik haduh 10 tarik Nohprah bad yn pyllait lyng ki social media (Facebook, Twitter/X, Instagram).
Ka jingpeit bniah ïa ki form kan long ha ka 11 tarik Nohprah.
Ka jingïakren pyrkhat (group discussion) bad ka interview kan long ha ka 15 tarik Nohprah 2025 ha Shillong.
Kala ong ruh ba ka jingkhot ïa ki samla ka long na ka daw ba ki samla ki don ka jingangnud ban kren paidbah ha ka por ba ka ri ka shem jingeh ha ka bamsap, ka jingkiew dor, hynrei kim ioh lad ban pynsngew.
