Pynbna u DC WJH ba la shah ban plie ki skul, ki jaka jngohkai bad ki kali kamai Shillong naduh ka 1 tarik
Jowai: Kum shi bynta ka jingbteng biang ia ka hukum hapoh ka Section 144 Cr.P.C. na ka liang u Deputy Commissioner ka West jaiñtia Hills District u la pynmih ia ka hukum mynta ka sngi ba naduh ka 1 tarik u bnai Nailur 2021 la shah ban plie ki jaka pule ki jaka jngohkai pyrthei bad ki kali kamai ban iaid na West Jaiñtia sha East Khasi Hills District, Shillong.
La shah ban plie biang ki jaka pule kiba la ithuh da ka tnad Educational Department jong ka sorkar Meghalaya. Ki kyndon ban plie ia ki skul ha ki jaka sor ki long kumne harum:-
Ia ki klas 1 haduh V – yn leh lyngba ka Online
Ia ki klas VI haduh VIII – la shah ba kin leit mih sha skul
Ia ki klas IX haduh XII- La shah ban pynlong klas baroh
Ha kaba iadei pat bad ki skul kiba don sha Nongkyndong la pynbeit kumne harum:-
Ia ki klas 1 haduh V – la shah ba kin leit mih sha skul.
Ia ki klas VI haduh VIII bad ki klas IX haduh XII la plie baroh.
Ki District School Education Officer bad ki Sub-Divisional School Education Officer ki dei ban peitbniah bha ban bud ia ki kyndon ba la pynmih da ka tnad Education Department jong ka sorkar Meghalaya.
Ha kaba iadei bad ki Ophis Central Government bad ki Ophis State Government la shah ba kin plie 100% bad ki dei ban khang ha ka por 5.00 PM man la ka sngi.
La shah ban plie ki Bank bad ki Post Office haduh 100% bad ban khang 5.00 PM janmiet man la ka sngi. La shah biang ban plie ki jaka jngoh pyrthei kiba don hapoh ka Jylla bad ia kiba wan nabar ka Jylla ruh. La bthah ruh ba ki Tourism Officer, kiba don hapoh ka West Jaiñtia Hills District ki dei ban peit thuh bha ba ki paitbah kin bud ia ki kyndon ba la pynmih da ka tnad Tourism Department jong ka sorkar Jylla.