Ka Kñia Ryngkaw bad ka Nohsakyriat ka Raij Ialong-Wahiajer kaba ju long shisien shisnem ha u bnai April (Iaiong) shwa ban bet ia u Kba ha ki Hali ki Pynthor jong ki, kala poi sha kaba kut mynta ka sngi da ka jinglehkmen Nohsakyriat ha madan Ryngkaw Ialong.
Ka jingpynkhreh ia kane ka kñia Ryngkaw bad Nohsakyriat ka la sdang naduh ka 17 tarik mynta u bnai, ha kaba ki Wasan (Longsan) ki lum ki lang ia u Synniang u Bynhei, u Khrong u Tri na ki khun ki hajar jong ka Raij da u khaw lane da ka pisa kata kaba ki ai. Na une u Synniang u Bynhei ki shet Pyrnah ban suit ban shor ha ka kñia ka khriam ka duwan ka dupat jong u Ryngkaw u Basa uba long u Blei nongda nongker ia ka shnong ka thaw bad ia ka Raij ka Mulut.
Ia ka kñia Ryngkaw kila pyndep hynne ka sngi (25/04/2025) dang step phyrngap shwa ban mih ka Sngi da ka kñia la ne khat uwei u ‘yiar Ryngkooh uba la jied kynsai. La ong ruh ba une u Ryngkaw u dei hi u Blei uba ker uba da ia ka shnong ka thaw, ka Raij ka Muluk na ka khlam ka ngoh, ka myntoi ka maia, na ka tyrut ka smer bad na kiwei de ki jingsniew.
Hadien ba la dep ka kñia Ryngkaw ki wan shisyndon sha ïing u Langdoh bad ai jingkñia da kawei ka ‘yiar kynthei kaba la jied kynsai ia ka Syiem Duwan, kaba long ka ‘Lei apïing kaba da kaba ker ia ki longïing longsem jong ka shnong ka thaw ka Raij ka Muluk. Na ki dak ki shin u jingkñia la sngewthuh ba u Blei, ki Blei kila pdiang hun ia ka Nguh ka Dem bad kum ka dak ka jingkmen la pynlong ia ka Nohsakyriat ka jinglehkmen ha ka hok katkum ka hukum.
Ia kane ka jinglehkmen Nohsakyriat la wan plie da u ma Jesse Suiam, MDC uba dei ruh u Executive Member ba dei peit ia ka Taxation jong ka JHADC kum u kongsan, katba u Dalloi Chanki Langbang, Dalloi ka Elaka Shangpung u Symbud kongsan.
U na Jesse Suiam MDC haba kren ha kane ka sngi u pynpaw ia ka jingkmen ba ka Raij Ialong-Wahiajer bad Nongkhyllem ki nongshong shnong jong ka kiba dang lah ban bat hi triang ia kane ka Nohsakyriat kaba long kawei kawei na ki dustur (Culture) kaba la saiñdur da ki longshwa ban shwa ia ki longdien jong ka Raij. La katta ruh u ong ban nang pynneh pynsah ia kane ka Nohsakyriat na ka bynta ka pateng ka ban dang wan ka shong ha kti jong ki Samla ba mynta.
Khaw ha shwa la ioh ia ka jingkren na u Dalloi Chanki Langbang, ka jingkren bad ka sneng ka kraw kiba sngewtynnad, ha kaba iadei bad kane ka Nohsakyriat bad ka kñia Ryngkaw kñia Basa. La ioh ia ka jingkren maitphang shaphang ka Nohsakyriat da u ma Lehbha Phawa. Ia ka jingialang la pyniaid da u ma Pyrkhat Shylla, President ka Sein Raij Ialong-Wahiajer.
