Kumba ki sngi ki taïew jong ka Shad Ñiam Behdeinkhlam hapoh ka Raij Jowai ki la jan poi kumta ki Shakri ñiam ka Raij naduh u Dolloi, Pator, Langdoh, Sangot, ki Wasan ryngkat ki Kñi jong ki kur ba ïadon bynta ha ki kam ñiam ki la ïabunkam ha ka ban pyndep ïa ki jinglehñiam ne kñia ainguh bapher kiba long kat kum ki adong ñiam ba ladep buh ryntih naduh basdang ka Raij ka Shnong.
Ha kane ka taiew jong ka 15 tarik u Jylliew kawei na ki jinglehñiam ba la pyndep ka dei ka Kñia Khang kaba long ka jingkñia ainguh aidem ïa ki Blei Shnong Blei Raij kiba ïeng ban ker ban da ïa ka shnong ka raij na ka sniew ka smeh, ka tyrut ka smer kiba wan ha ki rukom bapher.
Mynta u snem hapdeng ka jingjur u slap ha man ki phang ka jingpyndep ïa kane ka jingkñia ainguh da ki Shakri ñiam ka Raij ka long kaba ïaibeit ïaid ryntih bad shongkun shongblei bad da ka jinglah ban pyndep ïa kane ka jingkñia ainguh ba shisien shisnem shwa ban poi ki sngi ki ïa jong ka Shad Ñiam Behdeinkhlam ka shnong ka raij kan nangïoh ïa ka shongsuk shongsaiñ, ka manbha manmiat ryngkat ka roi ka par ha baroh ki liang.
