Kumba ka jingpynkhreh ïaka Shad Niam Behdeiñkhlam hapoh ka Raij Jowai kala ïaid shait shait shakhmat ha kaba ki khun ka ñiamtre naduh ki dong ki shnong bad ki longïing ba ïadon bynta ha kum kane ka por kila ïa bun kam naduh ka jingpynkhreh ïa ki Rot bad kiwei ki rukom lehñiam.
Ha kane ka 23 tarik u Jylliew ki shakri ñiam ka Raij Jowai naduh u Doloi, u Pator, ki Sangot, ki Wasan, ki kni jong ki Phra Kur Phra Kmai ryngkat ka jingïadonbyntalang ki Soo Langdoh bad ki Kñi na man ki longïing jong ki khun ka Ñiamtre kila ïaleit sha Loom Mookhai ban pyndep ïa ka lehñiam Kñia ainguh aidem ba shisien shisnem ïa u Syiem Pyrthat bad ïa u Mon Ryngklaw.
Ha kane ka step shwa ban mih na ïing Langdoh, u Dolloi, Pator, Langdoh, ki Sangot ryngkat ki shakri ñiam ka Raij Jowai kin hap ban peit bad bishar ïa ki dak ki shin ba paw ha ki lai tylli ki Kpu Ñiam ba la shet kyrpang da ka Langdoh, kiba long na ka bynta ka Raij ka shnong, na ka bynta u Doloi bad na ka bynta U Langdoh-ka Langdoh.
Hakhmat ka duwan ïa kane ka jingkñia ainguh la pyndep da u Sangot Paswet ha ryngkat ka jingsynranlang u Sangot Pasubon bad u Sangot Pakyntein kiba long ki pateng khun pateng ksiew ka kur Sookpoh Khat-ar Wyrnai.
U Doloi ka Elaka Jowai Waheh Puramon Kynjin haba ïakren ula ïathuh ba kane ka dei kawei na ki jinglehñiam ha kaba nalor ki khun ka Raij Jawai lawan ban ïadon bynta lang ruh da kiwei ki Raij kum na Raij Chyrmang, Tuber bad Ialong bad kane ka jinglehñiam ka long kyrpang ban ai nguh ai dem ïa u Syiem Pyrthat bad ïa u Mon Ryngklaw.
Ka jinglah ka Raij Jowai ryngkat ki Soo Langdoh bad pyndep ïa kane ka lehñiam kumba la buh kan long ka jingkyrkhu bakhraw ïa baraoh ki khun ka Raij ka Shnong kumjuh ïa ka ri bad ka jaitbynriew ha ka Nongrim jong ka ‘Tipbriew-Tipblei bad Kamai ïa ka hok’.
