Ka Raij Jwai hapoh ka jinglamkhmat u Dolloi Puramon Kynjin kum u khlieh ka niam khlieh ka Elaka mynta ka 19 March dang step phyrngap ryngkat ki Wasan bad ki Kni na man ki longing jong ki khun ka niamtre ki la iamih na iing Langdoh ban leit pyndep ia ka lehniam knia ainguh ai dem ha ka Duwan Knia ba don ha Law Kyntang Law Langdoh jong ka Raij Jwai.
Kat kum ka jingngeit ba ha kane ka sngi Thoh Langdoh, hapoh ka Raij Jwai ki khun ka niamtre kim ju bit ban leh kino kino ki kam kiba long pyrshah ia ka adong niam adong blei, kata ka mut la adong pyrshah ba kim bit ban trei ban ktah da kaba pyntakha, pynmong ne pynsniew dur ia ka mariang namar bakane ka sngi ka long kawei na ki sngi ban pyni ha khmat ka pyrthei ia ka jinglong kordor bad kheinkor kheinburom ia ki jingkyrkhu ba ka mariang ka ai ia u khun bynriew.
U Dolloi Puramon Kynjin haba batai shaphang kane ka sngi, u ong ba ka jing don ki Law kyntang Law Langdoh ka long ka jingkyrkhu ba khraw ia u khun bynriew ha kaba ki diengheh diengsan ki mih ki plung ban ai ia ka um bad sei ia ka lyer pyngad kiba long ka jingmyntoi ba khraw ia ka shnong ka raij kumta ban sumar bad pynneh pynsah ia ka jinglong kyrpang jinglong kyntang jong ki ka long kaba donkam na ki por sha ki por bad kyrpang ruh ha kum kane ka sngi Thoh Langdoh, kaba long ka sngi ba la dep adong ba ym bit ban leh kino kino ki kam ki ba long pyrshah ia ka adong niam adong blei. Shuh shuh u Dolloi u kitbok kitrwiang ruh ia ki khun ka Raij ka shnong bad Elakaba da ka jinglah ban pyndep ia kane ka lehniam knia ainguh aidem, ki khun ka raij ka shnong bad elaka kin ioh ia ka pyrthei mariang ba bit babiang ha baroh ki liang bad ruh u khmih lynti ba ki khun ka Raij ka shnong baroh kin ioh ban ia shim bynta ha ka Shad Niam Behdeinkhlam mynta u snem ha ryngkat ka jinghun jingsuk mynsiem bad ka jingiphuh iphieng.
