Kumba ju long manla u snem mynta sa shisien ka Sein Raij Mukhla mynta ka sngi (Muchai 01.04.2022), kala ioh ban pyndep ia ka jingkñia ainguh aidem ia ka Blei Syem Khlam bad u Blei Ram Shyllong kiba long ki Blei nongker nongda bad ki nong ri nongsumar ia ki khun ki raiot ka Sein Raij Mukhla.
Ia kane ka jingleh Niam kaba la juh leh manla u snem hashwa ba ki khun ki raiot ka Sein Raij Mukhla kin hiar rep ia ki Symbai Jhur symbai riew hadem u phan bad kiwei kiwei de ki jait jhur ba bun jait. Hapoh ka Sein Raij Mukhla katba ym pat pyndep ia kane ka jingknia ia ka Syiem Khlam bad u Ram Shyllong, ki khun ka Sein Raij Mukhla kim pat long ban thung jhur thung riewhadem thung phan bad kiwei kiwei de bad kane ka jinglehniam ka dei ka jinglehniam ba nyngkong eh jong u snem, katba ki wei pat ki jingleh niam ki dang bun shuh hapoh u snem, ki ban sa pyndep katkum ki por bad ki Samoi. Ha kane ka jingleh Niam knia ki khun samla ka Sein Raij Mukhla, ki la pynkhreh ia u Kymphu da u skhen kum u syntiew kaba mut ban beh ban sympat ia ka pang ka shitom na ka Sein Raij Mukhla.
Ia kane ka jingknia la sdang ia ka naduh ka por 7 baje mynstep ha iing blei ka iing Mei Langdoh, hadien bala pyndep ia ki kam hapoh ing ka Bei Langdoh bad u Pa Langdoh ryngkat bad u Maji u Chutia lem bad ki Waheh Sankur kila mih ban leit knia sha ka duwan knia ha khlaw blei kaba la pyndep ia ka da u Maji Niam ka Sein Raij Mukhla u ba na ka Kur Sari, da kaba pyndonkam da uwei u Syiar Ryngkoh (Shynrang) bad ka Sniang.
Mynta u snem ka knia ka khriam ka long kaba bha, kum ka Sein Raij Mukhla ka khmih lynti ba ki khun ki raiot ka Sein Raij Mukhla, kin ioh ia ka koit ka khiah kum juh ruh kan biang ka kamai kajih kumjuh ruh ha ka liang ka pule puthi kin long kiba sei soh. Ka jingmut jong kane ka leh Niam knia ia ka Syiem khlam bad u Blei Ram Shyllong ka long kum ka jingainguh na ka bynta ban beh ia ka khlam ka pang ka shitom sha ba sep ka sngi u bnai khnang ba ki khun ka Raij kin ioh ia ka koit ka khiah. Kane ka long katkum ka khubor la phah da u Standbyme Sari.