Mynta ka sngi ka 27 tarik Rymphang 2025, ka dei ruh ka sngi kaba kyrpang bad ka ban sah kynmaw ha ka khana pateng jong ka KHADC ha kaba 29 ngut ki MDC ba thymmai ki la pyndep ia ka jingbam smai da ka jingialam jong ka Deputy Commissioner East Khasi Hills Kong Rosetta Mary Kurbah, ryngkat ka jingiadon lang ki ophisar ka council, kiba haïing jong ki MDC ba thymmai bad kiwei kiwei. Kane kan dei ruh ka khana ka ban sah kynmaw ha kaba ka VPP kaba dei ka seng ba thymmai kan ialam ha kane ka samoi treikam ryngkat ki MDC ka VPP kiba sdang thymmai ia ka jingiaid lynti ha kane ka saiñ hima.
Ki 29 ngut ki MDC kiba la pyndep ia ka jingpynbam smai ki kynthup 17 na ka VPP, 5 ngut na ka UDP, 4 ngut na ka NPP, uwei na ka HSPDP bad 2 ngut ki kyrtong khlem seng (indipendent) kita ki long u Bah Kynjohlang Rangtong (Mawhati Constituency) na ka VPP, Bah Banrikwes Nongsteng (Umsning) na ka VPP, Bah Isynei Hing (Umroi) na ka VPP, Willklinton Wankhar (Sohryngkham) na ka VPP, Bah Seiborlang Warbah (Mawkynrew) na ka VPP, Bah Kitborlang Syiem (Nongkrem) na ka VPP, Bah Shemborlang Rynjah (Langkyrdem -Laitkroh) na ka VPP, Kong Aibandaplin Lyngdoh Nonglait (Mylliem) na ka VPP, Bah Winston Tony Lyngdoh (Nongthymmai) na ka VPP, Kong Deity Majaw (Malki-Laitumkhrah) na ka VPP, Bah Strong Pillar Khajana (Mawkhar-Pynthorumkhrah) na ka VPP, Bah Denzil Raynard Chen (Jaiaw) na ka VPP, Bah Edison Kharumnuid (Mawlai) na ka VPP, Bah Lan Caster Marbaniang (Mawphlang Diengiei) na ka VPP, Bah Powell Sohkhlet (Pariong-Mawthadrishan) na ka VPP, Bah Pynkhrawborlin Kharjah (Mawkyrwat) na ka VPP, Bah J.Iawphniaw (Nongstoin) na ka VPP, Kong Grace Mary Kharpuri (Nongshken) na ka NPP, Bah Alvin K.Sawkmie (Mawsynram) na ka NPP, Bah S. Sohtun (Jirang) na ka NPP, Bah Rona Khymdeit (Nongpoh) na ka NPP, Bah Barikupar Synrem (Shella) na ka UDP, Bah Pius Marwein (Langrin) na ka UDP, Bah Titos Chyne (Sohra) na ka UDP, Bah Synshar Kupar Roy Lyngdoh Thabah (Sohiong-Nongspung) na ka UDP, Ekwetor Nongkhlaw (Mairang-Nongkhlaw), Bah S. Rashir (Mawshynrut) na ka HSPDP, Bah Ricky Shullai (Laban-Mawprem) kyrtong khlem seng bad u Bah Lurshai Kharbani (Rambrai Jyrngam) Kyrtong khlem seng.
Kane ka samoi kan long ruh ka samoi kaba kham phylla ha kaba u CEM ba thymmai bad ki dkhot ka EC ruh kin dang dei kiba thymmai ha kane ka kam. Kaba kham ioh mynsiem ka long ba u Bah Powell Sohkhlet MDC na Pariong-Mawthadrishan uba dei ruh u nongthoh khubor ba la rim ha ka jylla un don lang ha ka EC. Ki paidbah ki khmih lynti ba lehse ka jingdon jong une u Rangbah uba la ih bha ha ka jingtip na ka jingtrei ia ka kam kot khubor kaba palat 30 snem, kan don ka jingkylla ha ka synshar khadar ha KHADC.