Haduh 30 ngut ki samla ba kynthup ïa 17 ngut ki shynrang bad 13 ngut ki kynthei kila pyndep ïa ka jingshah hikai ba 45 sngi lynter, haka 1st Batch ban long kum ki Security, haka jingïalang leh burom (Pass Out Parade) kaba la long mynta ka snngi 6 tarik u Nailar, 2024 ha ka jaka training bala tip kum ka ‘Muksor Private Security & Services’ (MPSS) kaba don ha Thadmuthlong-C (Phramer) West Jaiñtia Hills District.
Ha kane ka prokram leh burom ïa kitei ki samla la pynbam smai ïa ki da u Managing Director u trai jong ka MPSS ma P. Muksor, haka jingïadonlang u ma Spearsing Pasleiñ DSP ka East Jaiñtia Hills kum u kongsan, ma Siril Suja kum u Symbud Kongsan, Rev. C.L Susngi, Secretary Shnong ma Yooki Suchiang, ki kmie ki kpa jong kitei ki samla nalor kiwei de kiba la shah khot sngewbha.
U ma P. Muksor ula ïathuh ba kane ka jingai jinghikai ïa kitei ki samla ka long kum ka jingsdang ïa ka kam ka jam jong ki ha ka liang ka Security, nangne kila ïoh shibun ki jinghikai haki rukom kilan met bapher bapher, ka rukom treikam bad ka akor ka burom.
Kitei ki samla kiba la dep ban shah hikai kan pynsuk shibun eh ïa ki ban wad ïa ki kam Security nalor ka jingdon jong ki syrnot (Certificate) kiba la pynithuh da katei ka jaka hikai MPSS.
U Kongsan u ma Spearsing Pasleiñ lem bad kiwei de kiba la ai jingkren ha kane ka sngi kila ai ka jingïaroh ïa u ma P. Muksor uba la don ïa kane ka mynsiem bad ïalam lynti ïa ki khun samla haka lad ïoh kam ïoh jam ha kum kane ka pyrthei kyrduh kam.
Kila ai mynsiem shuh shuh ïa u ma Muksor ba un dang ïaid shaphrang ha kane ka kam bad ban ai ka jinghikai kaba kham bha shuh shuh ïa ki samla kiba thrang ban wan shah hikai ha kane ka jaka kaba don ha Thadmuthlong-C, Phramer West Jaiñtia Hills District.
La pynphuh pynphieng ïa kane ka sngi da ki jingïaid parate, ki jingshad, jingrwai, ki jingkilan met bala shim bynta da kitei ki samla ba la pyndep ïa kane ka jingai jinghikai.
