Ki 30 ngut ki samla na kylleng ki bynta jong ka Ri-Lum Jaiñtia bad na na kiwei de, mynta ka sngi kila pyndep ïa ka jingshahhikai (training) ba 45 sngi ban long kum ki ‘Security Guard’ na kawei ka slem ai jinghikai kaba la tip kum ka ‘Sub-Center Tornado Security Agency’ kaba don ha shnong Iooksi Umdeinlin, West Jaiñtia Hills District.
Kine ki samla ba la shah hikai ki kynthup ïa ki 12 ngut ki kynthei bad 18 ngut ki shynrang kaba dei ruh ka Batch ba ar jong ka jingai jinghikai, kitei ki samla kila ïoh pdiang ïa ka syrnod mynta ka sngi ban pynshisha ba kin long kiba la bit pura ban shimti ia ka kam kum ki nongap pahara (Security Guard) ha kino kino ki Ophis treikam, ki Hospital, ki Skul, ki Bank bad kiwei kiwei ki ophis ba donkam Secutity Guard.
Ïa kane ka slem ai jinghikai la dei trai da ma Pyndaplang Muksor kum u Camp Commander & Training Incharge bad ha ka juh ka por uba ju synñiang ïa ki samla ban pynïoh kam la ki kino kino ki jaka treikam kum ha ki ïew heh (Mall), ki Bank, ki ophis treikam, nalor kiwei kiwei de.
Haba ai jingkren ha kane ka sngi u ma P. Muksor ula ïathuh ba mynshwa ula juh trei kum u Pulit (Battalion) naduh 2008 hynrei la dap ar snem mynta ula ieh noh ïa ka kam Pulit bad ula shimti da kane ka kam ban wanrah ïa kane ka Training Center na ka bynta ki khun samla.
“Kam long kaba suk ban wanrah ïa kane ka Center bad ki don shibun ki jingeh kiba lah ban ïa kynduh” bad kine baroh dei lyngba ka jingïeit jong nga ïa ka jait bynriew ong u ma Muksor.
Ula ong haduh mynta nga dang hap ban pynlut hi na ka pla la jong bad don ki por nga mut ban kynran dien noh hapdeng ki jingeh hynrei lyngba ka jingkyrshan lang jong u MLA ka thaiñ ma Nujorki Sungoh nga dang bteng ban ïaid shakhmat.
Kawei na ka jingkyntu jong u ïa ki samla ba kim dei ban don ka jingtieng hadien ba la dep ban shah hikai ha kane ka jaka, hynrei ki dei ban tur shakhmat namar ka lad kan sa plie hi wat lada long kaba rit ne kaba heh ha ka jingïoh, u kyntu ban long kiba ïaishah namar na ka um kaba rit ka pynlong ïa ka duriaw bah.
Ha ka juh ka por u buh ka jingkyrpad ïa ki bor sorkar ba kan ïarap ban ai jingkyrshan lem ïa kane ka jaka ai jinghikai jong u na ka bynta ki samla khnang ba ka lawei jong ki samla kin ïoh ïa ka lad ban trei ha ki kam bapher bapher.
Haka juh ka por ula pynsngew ka jingdon kane ka jaka ai jinghikai ïa ki samla wadkam kala ïarap shibun eh ïa ki samla ban lait na ki jingngop ha ki jingdih kiba sniew naduh ka kyiad bad u Drug, da kaba u buh ruh ïa ki lai tylli ki jingkyntu kaba nyngkong ‘ban long kiba don akor (Discipline), kaba ar ban long kiba biang por (Punctuality) bad kaba lai ban don ka jingkitkhleih (Responsibility)’.
Ïa kane ka sngi pynkut ïa ka jingshah hikai jong kitei ki 30 ngut ki samla la wan ïadonlang da u kongsan ma R.G. Sukhlaiñ uba la ai ka jingkitbok kitrwiang ïa u ma P. Muksor ba un nang ïaid shakhmat ha kane ka kam kaba long ka lad ïa ki khun samla wad kam ha kum kane ka juk ba mynta.
Kiwei de kiba don lang ki long u symbud kongsan uba dei u OC ka Jowai Police Station ma S. Manar uba kyntu ïa ki samla ban don ka jingngeit ha u Blei bad ban ïa burom kylliang iwei ïa iwei wat lada hap ïa kynduh shibun ki jingpynsoi hynrei dei ban long kiba ïeng skem ha ka nongrim. Na ka liang u Rev. Ribaitki Laloo uba la shim smai ïa kitei ki 30 ngut ki samla ba la dep shah hikai nalor ka jingdon ki kmie ki kpa jong ki samla bad kiwei de kiba shah khot sngewbha.
La pynphuh shuh shuh ïa kane ka sngi da ka jingïashim bynta jong kitei ki samla 30 ngut da ka jingïaid march Pass, ki jingshad pynbyrnia bad ki jingrwai pdiang bad jingrwai ai khublei.
