Haduh 64 ngut ki samla kiba kynthup ia 28 ngut ki shynrang bad 36 ngut ki kynthei mynta ka sngi 11.07.2023 ki la lah ban pyndep ia ka jingai jinghikai ne ka (Pass Out Parade). Ia kane ka jingai jinghikai ba 45 sngi lynter la pynlong ha Sub Center Tornado Security Agency kaba don ha Umdeinlin ha shnong Iooksi, West Jaiñtia Hills District bad la pynbam smai ia ki da u Rev R. S. Nongkynrih, ha ka jingiadonlang u ma S. Tang, Ex-MDC JHADC kum u kongsan, ma Letkor Dkhar Symbud Kongsan, ma Cassian Alphone Suchiang, ia ka jingialang la pyniaid da u ma Pyndapbiang Muksor uba long ruh u Camp Commander & Training Incharge jong kane ka Center.
U ma Pyndapbiang u la iathuh ba kane ka jingai jinghikai ia kine ki samla kaba mynta ka dei ka sien ne ka wat kaba saw jong ka Tornado Security, u la ong ba la wanrah ia ka kum kane ka jingai jinghikai ka long ba u pyrkhat jngai na ka bynta ka jingiohkam iohjam ki samla, namar kum kane ka jingai jinghikai ka long kum ka wait kaba ki samla ki la don lane ka lad ia ki ba kin suk ban wat ia ki kam Security namar hadien ba ki la pass ki la ioh ruh ia ki syrnot (Certificate).
Shuh shuh u la ong ba kane ka la don la kham slem hynrei da ka wei pat ka kyrteng ha kaba la bun ki samla ki la ioh ia ki kam Security Guard lyngba kane ka jingai jinghikai. U ma Pyndap u la pynpaw ruh ka jingsngew nguh ia u MLA ka thaiñ u ma Nujorki Sungoh u ba la noh synniang sha kane ka Center ha kine ki sngi ba la dep.
U Kongsan u ma S. Tang haba kren u la ong na ka liang jong u wat la um tip bha ia ki aiñ ki rukom hikai, hynrei haba u peit ia kine ki samla kila pyndep ia kane ka jingai jinghikai u la sngewhun shisha haba peit ia ka rukom pdiang burom, ka akor bad leh burom jong ki, na ka liang jong u, u la kyntu ia ki ba ki dei ban long kiba sngewrit bad kiba iaishah ynda ki la ioh ia ka kam ka jam ka jong ki. Na ka liang jong u, u la pynpaw ruh ka jingsngewnguh ia u ma Pyndap biang Muksor namar dei lyngba une u rangbah la lah ban wanrah ia kum kane ka jingai jinghikai kaba lah ban ai jingmyntoi ia ki khun samla.
La pynphuh pynphieng ia kane ka sngi da ki jingshad, jingrwai, jingrwai ieit ri, shad Comedy kiba la shim bynta da kitei ki samla ba la pyndep ia kane ka jingai jinghikai.
