Ka Bouncer Association of Meghalaya (BAM) Jaiñtia Hills mynta ka sngi 6 tarik u Naitung, 2024 kala ïoh ban pynkup burom sa 78 ngut ki samla kila pyndep pura ïaka jingshah hikai ban long kum ki ‘Security’ na ka bynta ka 3rd – 7th Batch, napdeng kine 57 ngut ki kynthei bad 21 ngut ki shynrang.
Ïa ka jingïalang pynkup burom ïa kitei ki 78 ngut la pynlong ha ha Tlane Mynkjai surok Dawki bala pynïaid daka General Secretary BAM-JH ka Pretty Lyngdoh, haka jingdonlang u ma Dameki Kma kum u kongsan, ha ryngkat ka jingdonlang u President ka BAM-JH ma Yoosar Kynjing lem bad ki dkhot ka Association.
Na ka liang jong ka BAM-JH kala dep ban ai jinghikai (Training) ïa kitei ki samla ha ki bynta bapher bapher naduh ka rukom kilan met bad ki rukom ai jingpahara bapher bapher, ha ka juh ka por kin long ruh ki nongïarap ba ha khmat eh ban wanrah ïa ka jingshongsuk shong shngaiñ hapoh ki shnong ki thaw.
Ha kane ka sngi la sam bad pynithuh ïa kitei ki samla bala dep shah hikai da ki Syrnod jong ka Association ha kaba kin ïoh ban apply ïa kino kino ki kam ki jam bad napdeng kine la jied 10 ngut ban long kum ki dkhot (official) jong ka BAM-JH.
Na ka liang u kongsan ma Damei Kma haka jingkren ula ai ka jingïaroh ba kyrpang eh ïa u nongseng jong ka Association uba long ruh u President jong ka ma Yoosar Kynjing uba don shisha ka mynsiem trei shitom ban wanrah kum kane ka kynhun ban pynïoh kam ïaki khun samla bad uba kloi ban ïarap ïa ki samla kiba don ïaka sap ka phong ha kino kino ki bynta ban nang kiew shaphrang.
Ula ai ruh ka jingkyntu ïa ki samla kiba la dep shah hikai ban kin long kiba don ka jingkitkhlieh ha ki kti la jong, kaba donkam eh ban ïoh ïa ka koit ka khia ha ka jingim, khnang ba yn lah ban ai ka jingshakri kaba bha tam.
Ula kyntu ban long ki briew kiba ïoh ka jingshañiah ha ka kam ka jam, kumjuh ruh ban long kiba stad ha ka kam da ka jingjem nud, ka jingsngewrit, ka jingburom markylliang bad ka jingbiang por.
Ula ai ka jingkitbok kitrwiang ïa kitei ki samla 3rd – 7th Batch kiba la dep shah hikai hapoh ka jingkhmih jong ka BAM-JH, da ka jingkyrmen skhem ba kin ïoh ïaki kam ki jam jong ki ha ki liang.
Na ka liang ki nongshah hikai kiba la ai jingkren kila pynpaw ka jingsngewkmen ban ïoh pyndep ïa ka training, kila ai khublei ruh ïa u President ka seng ula shim ïa kane ka lad ban ai jinghikai ïa ki.
Kila ong lyngba kane ka training kila ïoh shibun jinghikai naduh ka ktien ka thylliej, ka jinglong jingim bad kumjuh ïa ki jingtip ha ka rukom kilan met.
La pynshong shit shuh shuh ïa kane ka sngi da ki jingshad tynrai, ka Zumba Exercise na kitei ki samla ba la dep ban shah hikai, katba ïa ki kyntien ai khublei la ïoh na u Mephrangki Suiam uba dei u Publicity Secretary ka Association.
