[Rah ka Mukhap Handloom & Handicraft Co-operative Society, West Jaiñtia Hills ia ka nam lahduh]
Ka tnad treikam Textile, jong ka sorkar jylla, ha ka jingiatrei lang bad ka National Institute of Fashion Technology (NIFT), Ministry of Textiles, ka sorkar India, hynnin ka sngi ka la pynlong ia ka State Level Celebrations of the National Handloom Day 2023 ha ka Campus jong ka tnat trei kam ka NIFT, Umsawli, Shillong, ha kaba u myntri ka suh ka thaiñ, u Bah Paul Lyngdoh u la long u Kongsan bad u Nongmihkhmat na Nongpoh Constituency u Bah Mayral Born syiem kum u symbud kongsan ha katei ka sngi.
Ha ka jingkren, u Bah Paul Lyngdoh u la kot la wer ia ka jingdonkam ban shimkhia lang da baroh ki nongdon bynta ha ka ban pyndonkam hok ia ka sap kaba U Blei U la ai ha ki Nongsuh Nongthaiñ jaiñ tynrai jong ka jylla jong ngi. U myntri u la pynpaw ruh ia ka jingsngewkmen ka jong u ban tip ba ki nongthaiñ nongsuh jaiñ tynrai kiba naduh ka pateng kaba lai ki ia don lang ha katei ka sngi ban ai mynsiem ia kito ki nongthain jain tynrai ban bteng ia kane ka kam kaba u mynbarim bajah u la sdang.
Haba iathuh pat ba ki jaiñsuh tynrai jong ka jylla ki la ioh ia ka jingiaroh na ki ri Sepngi (Europe) bad na kiwei pat ki bynta jong ka pyrthei, u Myntri u la khot lang ia baroh ki nongsuh nongthaiñ jaiñ ba kin pyrshang ban pynwan dur ia ki jingthaiñ kiba kham phylla ha kane ka kam khnang ban lah ban pyni bad pynpaw ia kane wat shaduh ki kad khaïi kylleng ka pyrthei.
Haba kren ha katei ka jingialang, u bah Mayral Born Syiem u la ban khia ia ka jingdonkam ban don da ki kynja shap (GI) na ka bynta u sai Ryndia khnang ba kan long kaba myntoi shibun ban pynneh ia ka jinglong phylla ban ithuh bad tip ia une u sai ryndia. U la iai kren bad iai ban ia ka jingdomkam ban pynneh ia ka rukom u mynbarim bajah ban ri ia ki khniang ryndia, ban suh ban thaiñ ha ki thir, bad ruh ban pynneh ia ka rukom suit rong ia ki sai ryndia.
Ha kane ka programme, la ai ruh sha baroh ki nongiohmyntoi ia ka Pehchan Card bad Yarn kaba hapoh ka Income Generation Programme da u myntri ka suh ka thir, u Bah Paul Lyngdoh bad da kiwei kiwei ki heh sorkar. La ai khusnam ruh sha katto kattne ki briew shimet bad sha ki Cooperative Society jong ka jylla.
Ia ka khusnam kum ka Cooperative Society ka bhatam bad kaba shakri bha la ai sha ka Mukhap Handloom & Handicraft Cooperative Society, kaba don ha Jaiñtia Hills. Ia ka khusnam na ka bynta ka jaka thaiñ ne pynmih jaiñ ryndia tynrai kaba la seng da u/ka briew shimet la ai sha M/s Nangcwa Doiwom na Ri Bhoi District, ia ka khusnam kum u/ka briew ba paw bha ha kane ka kam la ai sha i Kong Ivy Lorna R Marak, na West Gao Hills, ka khusnam na ka bynta u/ka briew ba tbit bha ha kane ka kam thaiñ jaiñ la ai sha i Kong Manju Rabha, na East Khasi Hillls, katba ia ka khusnam ba ka bynta ki nongthaiñ nongthir jaiñ kiba la neh slem bha la ai sha i Kong Menri A Sangma na West Garo Hills.
Ha katei ka programme la pyllai paidbah ia kawei ka kot Coffee Table Book on Meghalaya Silk kaba la ai kyrteng da ka “Woven narratives” bad ruh u la plie pyrda ia ka Textile Map jong ka jylla Meghalaya.
