U kyrtong ka UDP na ka 10-Mynsngat-Khanduli u ma Damian S War mynta ka sngi 11 tarik u Rymphang, haka jingïalap election jong u ha shnong Mokoiram, West Jaiñtia Hills District ka jaka kaba don ha khappud Meghalaya-Assam, u khlem pyndem ha khmat jong ki briew Karbi kiba thmu ban pynsangeh ïa ka meeting ïalap election jong u, hynrei u iaid pyneh hi triang.
Ha kane ka jingwan kine ki briew kiba kam ïa lade ba kidei naka thaiñ Karbi Anglong ki ong ba kim shah ban pynlong ïa kane ka meeting namar kane ka jaka ka hap hapoh ka West Karbi Anglong, hynrei naka liang u ma Damian S War ryngkat bad ki nongkyrshan jong u kim ai lad ïa kane ka jingwan tuklar kaba ym don nongrim jong kitei ki briew bad kine ki briew ki hap ban phet Krad na kane ka jaka.
Haba ai jingkren u Ma D S War u ong ha i bor iba rit u lah dep trei borbah kum u nongïalam Seng Bhalang ban ïada ïaki paradoh parasnam khamtam ïaka khyndew ka shyiap haki thaiñ Khappud bad haduh mynta mynne u lah rung sha ka kam Saiñ Hima Sima ban trei borbah ryngkat bad ki nong kyrshan jong u bad kumjuh kiba ym lah ban kyrshan ïa u ba kin buh lem ha ka jingduwai naka bynta ka Ri kaba ieid.
Ula kyntu ïa ki nongshong shnong ka shnong Mokoiram ba kim dei ban duh jingkyrmen ba sa shisien ka sngi yn sa jop ïa kine ki jingeh kiba don ha khmat, lyngba ka jingïatrei shitom lang ban ïada lang ïa u pud u Sam.