Ka Knock-out Football Tournament Independence Cup Namdong B bala pyniaid da ka “Iai Neh Chaphrang Football Club” Namdong B kaba la sdang naduh ka 27.7.2022, la plie pyrda ia kane ka lympung da u MDC ka Mynsngat-Khanduli bad la wan ban pynkut noh ha ka 15 tarik August 2022 da u Ma Generous Paslein u Candidate u ban iakhun ha ka Election MLA 2023 na ka Nartiang Constituency.
Ki kynhun (teams) kiba poi sha ka Final ki long Ka “Tngen FC” Namdong B pyrshah ia ka team “Praising Sumer” na ka shnong Nongthymme Sehlama. Ka jingiakhun baroh ar ki team ka long ka ba iakhait bad itynnad khlem don ba ioh thep ha baroh ar ki kylla jong ka jingialehkai tad haduh ba da hap ban pynlong noh da ka Tie Breaker ha kaba la ioh rah ia ka jingjop da ka Tngen FC da ka ba u Goal keeper ka Tngen FC u Wanniang Thubru u la ioh ban kyrda ia ka bol ba la kynjat da u Bantei Nongrum ha ka jingiashut ba mar San ngut.
Ha kane ka jingiakhun la wan sakhi da ki paid nongshong shnong bad ki shnong ba marjan ha ryngkat ka jingiadon lang u Waheh Shnong ka Namdong-B ma D.S. War, u Waheh Raij ma Elias Susngi bad ki rangbah jong ka shnong bad la sam ia ka khusnam sha ki nongjop. La pynlong ia kane ka lympung kum shibynta ban rakhe ia ka 75th Independence Day ka Ri.
